MDB-də 2028-ci il Sosial İnkişaf və Həyat Keyfiyyəti İli, 2029-cu il isə Nəqliyyat Əlaqəliliyi İli elan edilib.
1xeber.media "Report"a istinadən xəbər verir ki, müvafiq qərarlar oktyabrın 9-da MDB Dövlət Başçıları Şurasının iclasında qəbul edilib.
2028-ci ilin Sosial İnkişaf və Həyat Keyfiyyəti İli elan edilməsi təşəbbüsü Qırğızıstanın Əmək, Sosial Təminat və Miqrasiya Nazirliyinə məxsusdur.
Onun həyata keçirilməsi əhalinin sosial dəstəyi sahəsində Birlik dövlətlərinin qarşılıqlı fəaliyyətinin möhkəmləndirilməsinə, əmək bazarında fəal tədbirlərin inkişaf etdirilməsinə, vətəndaşların rifahının və həyat keyfiyyətinin yüksəldilməsinə yönəlib.
2028-ci il ərzində davamlı sosial inkişafa və həyat keyfiyyətinin yüksəldilməsinə kömək etməyə yönəlmiş tədbirlərin keçirilməsi planlaşdırılır. Onlar sosial-əmək sahəsində normativ-hüquqi bazanın təkmilləşdirilməsini, pilot layihələrin həyata keçirilməsini, əhalinin sosial dəstəyi üzrə ən yaxşı təcrübələrin yayılmasını, eləcə də hüquqi, sosial-iqtisadi və demoqrafik siyasət məsələləri üzrə beynəlxalq forumların və dialoq meydançalarının keçirilməsini nəzərdə tutur.
2029-cu ili MDB-nin Nəqliyyat Əlaqəliliyi İli elan etmək təşəbbüsü Türkmənistana məxsusdur.
Bu qərar Türkmənistanın 2026-cı ildə MDB-də sədrliyi Konsepsiyası və onun icrasına dair tədbirlər planı ilə nəzərdə tutulan məqsədlərin reallaşdırılmasının məntiqi davamı olub.
Birlik çərçivəsində nəqliyyat əlaqəliliyi infrastrukturun inkişafını, müxtəlif nəqliyyat növlərinin əlaqələndirilməsini, sahənin rəqəmsallaşdırılmasını və daşımaların təhlükəsizliyinin təmin edilməsini nəzərdə tutur. Bu tədbirlər iqtisadi inteqrasiyaya, xarici ticarət əlaqələrinin möhkəmləndirilməsinə və regionun dayanıqlı inkişafına təkan vermək məqsədi daşıyır.
2026-cı ildə MDB-də sədrliyi çərçivəsində Türkmənistan iqtisadi əməkdaşlığın və nəqliyyat qarşılıqlı əlaqəliliyinin inkişafına, o cümlədən Birlik dövlətlərinin logistika və infrastruktur potensialının tam açılması üçün şəraitin yaradılmasına xüsusi diqqət yetirir.
Qarşılıqlı fəaliyyətin əsas istiqamətləri nəqliyyat əlaqəliliyinin inkişaf etdirilməsi, dayanıqlı və əlçatan nəqliyyat və tranzit dəhlizlərinin, o cümlədən dənizə çıxışı olmayan dövlətlər üçün formalaşdırılması üzrə səylərin birləşdirilməsi, habelə Xəzər regionunda çoxtərəfli əməkdaşlığın genişləndirilməsidir.
Bu istiqamətlər dayanıqlı inkişaf üzrə qlobal gündəliyə uyğundur və BMT-nin 2026-2035-ci illər üçün Dayanıqlı Nəqliyyat Onilliyinin elan edilməsinə dair təşəbbüsü ilə bağlıdır.
