Müstəqil Dövlətlər Birliyinin iştirakçı dövlətlərinin başçıları tarixi yaddaşın qorunması haqqında Bəyanat qəbul ediblər.
1xeber.media AZƏRTAC-a istinadən xəbər verir ki, sənəd oktyabrın 9-da Türkmənistanın "Avaza" Milli Turizm Zonasında MDB Dövlət Başçıları Şurasının iclasında imzalanıb.
Bəyanatda tarixi yaddaşın qorunmasının ayrı-seçkilik, irqçilik, ksenofobiya və dözümsüzlüklə mübarizədə təsirli vasitə olduğu vurğulanır. Tarixi bilmək dinc yanaşı yaşamağın təməllərini sarsıdan keçmişin təhrif edilməsinə, dezinformasiya yayılmasına və ekstremizm cəhdlərinin vaxtında müəyyənləşdirilməsinə və onların qarşısının alınmasına imkan verir.
Birlik ölkələrinin liderləri keçmiş, indiki və gələcək arasındakı əlaqənin tənqidi şəkildə başa düşülməsinin, eləcə də mənbələrin və tarixi əsərlərin hərtərəfli öyrənilməsi yolu ilə tarixi dəqiqliyin təmin edilməsinin vacibliyini qeyd ediblər.
Sənəddə deyilir: "Biz beynəlxalq ictimaiyyəti tarixi yaddaşı və tarixi həqiqəti qorumaq, xalqlar arasında sülhü, qarşılıqlı hörməti və etimadı möhkəmləndirmək, beynəlxalq hüququn ümumi qəbul edilmiş normalarına uyğun olaraq dinc və konstruktiv əməkdaşlıq təcrübəsini gələcək nəsillərə ötürmək, nasizmin, faşizmin və digər dağıdıcı ideologiyaların təriflənməsinin yolverilməzliyi prinsipinə ardıcıl olaraq riayət etmək üçün səyləri birləşdirməyə çağırırıq".
MDB dövlətləri açıq, dürüst, peşəkar və siyasətdən uzaq dialoq prinsiplərinə əsaslanaraq tarixi təhsil sahəsində əməkdaşlığı genişləndirmək niyyətindədir.
Prioritet sahələrə xatirə tarixlərinin təşviqi, MDB ölkələri arasında münasibətlərin inkişafının ən vacib mərhələlərini əks etdirən tarixi və xatirə yerlərinin qorunması, müvafiq tədbirlərin təşkili, alimlər, arxivçilər, arxeoloqlar, tədqiqatçılar, habelə gənclər və könüllü hərəkatlarının nümayəndələri arasında əlaqələrin genişləndirilməsi daxildir.
Bundan əlavə, planda MDB-nin iştirakçı dövlətlərinin Beynəlxalq Tarixçilər və Arxivçilər Assosiasiyası çərçivəsində əməkdaşlığının inkişaf etdirilməsi, eləcə də universal və regional beynəlxalq forumlarda tarixi yaddaşın qorunması üçün birgə təşəbbüslərin təşviq edilməsi nəzərdə tutulur.
