1xeber.media xəbər verir ki, Rusiya Müdafiə Nazirliyi Rusiya ordusunun Volçansk–Budarkı avtomobil yoluna tam nəzarəti ələ keçirdiyini iddia edib.
Nazirliyin oktyabrın 16-da yaydığı məlumata görə, Ukrayna Silahlı Qüvvələri həmin yoldan döyüş mövqelərinə sursat və ərzaq çatdırmaq üçün logistika marşrutu kimi istifadə etməyə çalışıb.
Rusiya hərbi qurumunun açıqlamasında bildirilir ki, döyüşlər zamanı hücum bölmələri artilleriya zərbələrinin dəqiqləşdirilməsini təmin edib, pilotsuz uçuş aparatlarının operatorları isə Ukrayna hərbi texnikasının hərəkətini izləyiblər. Nazirliyin iddiasına əsasən, aşkarlanan nəqliyyat vasitələri təyinat nöqtəsinə çatmadan məhv edilib və bununla da təchizatın qarşısı alınıb.
Rusiya Müdafiə Nazirliyi həmçinin rusiyalı hərbçilərin cəbhənin bir neçə istiqamətində hücum əməliyyatlarını davam etdirdiyini bildirib. Qurumun məlumatına görə, Sumı və Xarkov vilayətlərinin sərhədyanı ərazilərində təhlükəsizlik zolağının genişləndirilməsi istiqamətində də fəaliyyət göstərilir.
Qeyd edək ki, yolun tam nəzarətə götürülməsi və Ukrayna qüvvələrinin təchizatına vurulan zərər barədə məlumatlar Rusiya Müdafiə Nazirliyinin açıqlamasına əsaslanır. Məlumatda Ukrayna tərəfinin bu iddialara münasibəti yer almır.
