1xeber.media xəbər verir ki, Ukraynanın paytaxtı Kiyev şəhəri körpülərlə bağlı vəziyyətin pisləşməsi və nəqliyyat infrastrukturunun sıradan çıxması nəticəsində iki hissəyə – Dnepr çayının sağ və sol sahillərinə bölünə bilər.
Bu barədə Ukrayna Ali Radasının Nəqliyyat və İnfrastruktur Komitəsi sədrinin müavini Vladimir Kreidenko açıqlama verib. Onun sözlərini UNİAN agentliyi Telegram kanalında yayıb.
Deputatın sözlərinə görə, Rusiya zərbələri nəticəsində kritik infrastruktur obyektlərinin zədələnməsi davam edərsə və şəhər rəhbərliyi alternativ nəqliyyat imkanları yaratmasa, Kiyevdə metronun uzun müddət fəaliyyətini dayandırması və ciddi nəqliyyat böhranının yaranması riski mövcuddur.
Kreidenko bildirib ki, 2027-ci ilin fevral ayı – martın əvvəllərində şəhərdə iki müvəqqəti ponton keçidinin istifadəyə verilməsi nəzərdə tutulur. Bununla belə, deputat həmin keçidlərin gündəlik 300 min avtomobilin hərəkətini təmin edə biləcəyinə şübhə ilə yanaşır. Bu rəqəm hazırkı avtomobil axınının təxminən yarısına bərabərdir.
Qeyd edək ki, Kiyevin meri Vitali Kliçko noyabrın 7-də Rusiya hərbçilərinin zərbəsindən sonra Şimal körpüsündə yaranmış zədələri əks etdirən görüntüləri yayıb. İki gün sonra şəhərdə ciddi nəqliyyat sıxlığı və hərəkət çətinlikləri yaranıb.
Bənzər vəziyyət oktyabrın 27-də Cənub körpüsünə endirilən zərbədən sonra da qeydə alınıb.
Deputatın açıqlamasına görə, körpülərin fəaliyyətində yaranan problemlər və alternativ keçidlərin məhdudluğu paytaxtın sağ və sol sahilləri arasında nəqliyyat əlaqəsini ciddi şəkildə çətinləşdirə bilər.
