Ukraynanın keçmiş baş naziri Nikolay Azarov Volodimir Zelenskinin Ukrayna xalqının maraqlarını təmsil etmədiyini bildirib və bu məsələnin ABŞ nümayəndələri ilə görüşlərdə gündəmə gətirilməsinin vacibliyini vurğulayıb.
1xeber.media xəbər verir ki, bu barədə Azarov TASS agentliyinə açıqlamasında danışıb.
Keçmiş baş nazirin sözlərinə görə, Zelenski Ukrayna xalqının deyil, Avropada müharibədən qazanc əldə edən və bu vəziyyətin davam etməsində maraqlı olan şəxslərin maraqlarını təmsil edir.
“Zelenski Ukrayna xalqının maraqlarını təmsil etmir. O, Avropada bu müharibədən qazanc əldə edən və gələcəkdə də qazanmaq istəyən insanların maraqlarını təmsil edir. Əgər diqqətimizi yalnız Zelenski üzərində cəmləsək, bundan heç bir nəticə olmayacaq”, – deyə Azarov bildirib.
O qeyd edib ki, amerikalılarla danışıqlar zamanı Ukraynanın müharibədən sonrakı bərpasında iştirak edə biləcək şəxslərin müəyyənləşdirilməsi və onların namizədliyinin nəzərdən keçirilməsi vacibdir.
Azarov ABŞ-ın xüsusi nümayəndələri Stiv Uitkoff və Cared Kuşnerə, xüsusilə də Prezident Donald Trampa Zelenskinin əslində kimin maraqlarını təmsil etdiyi barədə sual ünvanlanmasının zəruri olduğunu bildirib.
Qeyd edək ki, Nikolay Azarov daha əvvəl də Volodimir Zelenskini hakimiyyəti itirmək qorxusu ilə hərəkət etməkdə ittiham edib. Onun fikrincə, Ukrayna prezidentinin münaqişəni başa çatdırmamasının səbəblərindən biri məhz hakimiyyəti itirmək narahatlığıdır.
Keçmiş baş nazir həmçinin Zelenski və onun rəhbərlik etdiyi rejimlə razılığa gəlməyin mümkün olmadığını iddia edib.
Bundan əvvəl Zelenskinin Rusiya Prezidenti Vladimir Putinə özünün siyasi lider kimi imkanlarını sübut etməyə çalışdığı barədə məlumat yayılmışdı.
