Ötən gün həkimin əməliyyat otağında ad gününü qeyd etdiyi əks olunan görüntülər gündəmə bomba kimi düşdü. Yəqin ki məsələ ilə bağlı ağıllarda çox sual yaranıb. Axı daim sterilizə olunmalı bir yerdə tortun, şamın nə işi var? Bu, nə dərəcədə doğrudur?
1xeber.media xəbər verir ki.lent.az məsələ ilə bağlı kiçik bir araşdırma edib.
Hər kəs iki əlli razılaşar ki, bu dünyada insan həyatından daha dəyərli heç nə yoxdur. Bəs biz insanlar, həyatımızı, sağlamlığımızı, bədənimizi kimlərə əmanət edirik? Təbii ki, tibb işçilərinə.
Amma həkimlərin məsuliyyətsizliyi bir deyil, iki deyil…
Səhiyyə nümayəndələri barəsində tez-tez o qədər “maraqlı” xəbərlər çıxır ki, onların içdikləri Hippokrat andına şübhə yaranır desək, yanılmarıq.
Elə bu hadisə də onlardan biridir. Deməli, əməliyyat otağında bir xanım yeni bir can dünyaya gətirir. Lakin videoda körpənin çığırtıları əvəzinə, “Happy Birthday” mahnısı və təbrik sözləri eşidilir.
Əlbəttə ki, xoş günlərə biz də sevinirik, amma bu anları harada və necə qeyd etdiyimiz də önəmlidir axı.
Yazıq xəstə də əməliyyat stolunda həkimlərin öpüşüb-qucaqlaşmasının qurtarmağını gözləyir ki, körpəsinə qovuşsun.
Bəs onun hüquqları? Qanun nə deyir?
Məsələ ilə bağlı danışan hüquqşünas Ramil Süleymanov bildirib ki, yayılan görüntülərdə kifayət qədər qanun pozuntusu var:
"Videoda gördüyümüz pasiyentin şəxsi həyata hörmət və xəstə sirrinin qorunması hüququ pozulmuş hesab olunur. O, hüquq mühafizə orqanlarına ərizə ilə müraciət edərək öz iradəsi olmadan belə bir görüntünün çəkilməsi və yayılmasının araşdırılmasını tələb edə bilər. Prokurorluq orqanları bu araşdırmanı apararkən xəstə ilə German Klinikası arasında hər hansı bir xidmət müqaviləsinin olub-olmadığını da, xidməthaqqı olaraq ödənişmiş məbləğin xəstəxananın kassasına köçürülüb-köçürülmədiyini də ortaya çıxaracaq".
"Eyni zamanda, xəstənin tamamilə ixtiyarı var ki, ona dəymiş maddi və mənəvi zərərlə bağlı ümumi qaydada məhkəməyə müraciət etsin. Maddi zərər xəstənin əməliyyat haqqı, müayinə ödənişləri və ya hadisədən sonra mənəvi sarsıntı keçirəcəyi təqdirdə xərcləyəcəyi pul ola bilər. Bununla yanaşı, görüntülərin yayılması nəticəsində xəstəyə dəymiş mənəvi zərərin qarşılanması tələb oluna bilər.", - deyə o əlavə edib.
Hüquqşünasın sözlərinə görə, əməliyyat otağının sterilliyi və tələbləri ilə bağlı Ümumdünya Səhiyyə Təşkilatı (ÜST) tərəfindən zaman-zaman müxtəlif formada protokollar tərtib olunub:
"Bu protokollar ayrı-ayrı dövlətlər tərəfindən imzalanır və tətbiq olunur. Onların Azərbaycan Respublikası ərazisində qüvvəyə minməsi isə Nazirlər Kabineti və Səhiyyə Nazirliyinin qərarı ilə tənzimlənir.
Ümumilikdə məsələnin tam dərindən araşdırılacağına heç bir şübhəm yoxdur. Nəticə etibarilə, araşdırılacaq və qəbul olunacaq material gələcəkdə digər həkimlərin də belə davranışlardan çəkinməsinə səbəb olacaq".
Sonra da deyirlər ki, camaat bizi qınayır. Belə bir hadisəni çəkib, hazırda virusdan belə daha təhlükəli olan sosial şəbəkələrdə paylaşanda əlbəttə ki, xalq “qınamaq düyməsi”ni işə salacaq. İnsanlara nə lazımdır? Bir hadisə olsun və məzəmmət etsinlər.
Sadə camaatı başa düşdük. Bəs, hadisə qəhrəmanının həmkarları bu barədə nə düşünürlər?
Elə bu suala cavab tapmaq üçün cərrah Adil Qeybullaya müraciət etdik.
Tanınmış cərrah əməkdaşımıza bildirib ki, cərrahi əməliyyatların, operasiya gedişlərinin və xəstə sirrinin ictimailəşdirilməsi onun ixtiyarı xaricində baş verə bilməz:
“Bu hərəkət həkim etikasının pozulması ilə yanaşı, həm də hüquqi məsuliyyətə səbəbiyyət yaradır”.
“Əməliyyat otağından bu cür görüntülərin yayılması eyni zamanda klinika üçün utancverici bir haldır. Bu məsələlər qanunla tənzimlənməli və hansısa formada qaydaya qoyulmalıdır”, - deyə həkim bildirib.
Qeyd edək ki, Səhiyyə Nazirliyi Analitik Ekspertiza Mərkəzi (AEM) tərəfindən artıq yoxlamalara başlanılıb.
Görünür, müzakirələrə səbəb olan cərrah mama-ginekoloqu L.Əliyevanı qınayanların sayı getdikcə artır. Qınamaqla belə hallar düzəlsəydi, nə var idi. Yaxşısı budur, bu məsələlərə əməlli bir əncam çəkilsin. Bəlkə o zaman həkimlərimiz öz andlarını nə üçün içdiklərini xatırlayalar.
