Britaniyalı aktyor Cud Lounun Rusiya prezidenti Vladimir Putini canlandıracağı “Kreml sehrbazı” filminin yaradıcıları Kremllə əlaqə saxlamayıblar.
1xeber.media xəbər verir ki, bunu Rusiya liderinin mətbuat katibi Dmitri Peskov deyib.
"Biz əslində belə mesajlar gördük, lakin bu barədə heç nə bilmirik. Və təbii ki, biz bunun nədən ibarət ola biləcəyini, süjetin nədən ibarət olduğunu, bu filmin nədən bəhs etdiyini və sairəni bilmirik", – Peskov jurnalistlərə açıqlamasında qeyd edib.
Bundan əvvəl Cud Lou "Deadline"a müsahibəsində Vladimir Putini canlandıracağını bildirmişdi. Aktyorun dediyinə görə, o, hələ ki, rolun üzərində işləməyə başlamayıb. O, həmçinin qeyd edib ki, buna hazırlaşmaq Everesti dırmaşmağı xatırladır.
“Kreml sehrbazı” italyan yazıçısı Giuliano da Empolinin 2022-ci ildə nəşr olunan eyniadlı kitabının uyğunlaşdırılmasıdır. Layihənin rejissoru fransız kinematoqrafı Olivye Assayasdır.
