Gəncə şəhərində qanunsuz parklanmaya görə sürücülər cərimə olunur.
Bu barədə Gəncə sakini video çəkərək sosial şəbəkələrdə paylaşıb.
Belə ki, o, qanunsuz parklanmadan şikayətlənib və gündə onlarla sürücünün məcburi şəkildə cərimə edildiyini bildirib.
Bəs, Gəncədə hələ də qanunsuz parklanma yerləri varmı? Aidiyyəti qurumlar tərəfindən buna tədbir görülməlidirmi?
Görüntüylə bağlı Daxili İşlər Nazirliyinə sorğu ünvanladıq.
Nazirliyin mətbuat xidmətinin Gəncə regional qrupunun baş inspektoru Eşqin Qasımov açıqlamasında həmin videonun araşdırıldığını bildirib:
"Məsələ ilə bağlı araşdırma aparılır. Araşdırmaların nəticəsinə uyğun hüquqi qiymət veriləcək".
Məsələ ilə bağlı AZXEBER.COM-a açıqlama verən Milli Məclisin Gəncə şəhərindən seçilən deputatı Naqif Həmzəyev bildirib ki, Gəncədə parklanma problemi həll edilməlidir:
"Gəncə şəhərində, əsasən də şəhər mərkəzindəki yollar asfaltlandıqdan sonra təbii ki, bu yollarda yeni xətlənmə işləri də həyata keçirilib və bəzi yolların hərəkətlərində dəyişikliklər edilib. Biz inanırıq ki, bu dəyişikliklər nəticə etibarilə Gəncə şəhərində tıxacın qarşısının alınmasına və hərəkətin daha da səmərəli və rahat olmasına gətirib çıxaracaq. Ancaq sürücülərin qarşılaşdığı çox ciddi bir problem var, çünki bu xətlənmələr nəticəsində bir çox yollarda qoşa xətlər çəkilib ki, bu xətləri də bilirsiniz ki, ayaqlamaq, qarşı tərəfə keçmək qadağandır, cəriməsi var. Məhz həmin yolların hər iki tərəfində də avtomobillər necə gəldi park edirlər və bu yollarda hərəkət edən sürücülər məcburən qoşa xətləri kəsməli olurlar, bu qoşa xətlərdən keçməli olurlar və həmin ərazidə yerləşdirilən kameralar da təbii ki, həmin sürücülərə cərimələr göndərir və cərimələnirlər. Bu da haqlı narazılığa səbəb olur. Bu baxımdan da bu qoşa xətlərin çəkilməsi, Gəncədəki avtomobil yollarının xətlənməsi ilə yanaşı, məncə, parklanma problemi də həll edilməlidir. Çünki Gəncə şəhərində necə gəldi, harada gəldi avtomobili saxlayırlar və parklanma qaydalarına demək olar ki, əməl edilmir və bu da nəticədə sürücülərin yollarda sərbəst, rahat hərəkət etməsinə çox böyük problem yaradır".
Deputat bir zamanlar Bakıda da parklanma probleminin olmasını, sonradan isə həll edildiyini xatırladıb:
"Məhz bu parklanma ilə əlaqədar, xatırlayırsınızsa, Bakı şəhərində də zamanında elə idi. Kim gəldi, necə gəldi saxlayır, pul yığırdı və bu pulların hara getdiyi, kimlər tərəfindən mənimsənildiyi məlum olmurdu. Mən düşünürəm ki, Gəncə şəhərində də parklanma ilə bağlı xüsusi nizam-intizam yaradılmalıdır. Xüsusilə də Nazirlər Kabinetinin qərarı var, tariflər müəyyənləşdirilib və buna uyğun da bu parklanma problemi Gəncə şəhərində öz həllinə tapmalıdır. Nizam-intizam tətbiq edilməlidir ki, həm sürücülərin rahat yollarda hərəkəti təmin edilsin, həm də parklanma qaydalarına riayət olunsun. Nəticədə bu qədər əziyyət çəkilib, yollar yenidən asfaltlanıb, estetik cəhətdən də yollardakı bu qarışıqlıq aradan qaldırılmalıdır. Mən inanıram ki, aidiyyəti qurumlar bu məsələyə ən qısa zamanda əncam çəkəcəklər və şəhərdə avtomobillərin rahat hərəkəti təmin ediləcək".
Parlamentari problemin həlli yoluna da toxunub:
"Problemin həlli yolu odur ki, Nazirlər Kabinetinin konkret bu barədə qərarı var. Bakı, Sumqayıt və Gəncə şəhərlərində parklanma tarifləri müəyyənləşdirilib. Buna uyğun olaraq da Gəncədə parklanma xidməti təşkil edilməlidir. Xətlənmələr yalnız yolu iki yerə ayırmır, ona görə təkcə o yox, parklanma xətləri, eyni zamanda parklanmaya dair xüsusi nişanlar çəkilməlidir ki, bu yolda parklanma olar yoxsa olmaz. Ümumən, ictimaiyyət bununla bağlı məlumatlandırılmalıdır".
