Türkiyənin Antalya şəhərində Muay Tay və Tayboks Federasiyasının prezidenti Araz Musayevin bıçaqlanmasında təqsirləndirilən şəxslərin məhkəməsi keçirilib.
1xeber.media xəbər verir ki, məhkəmə prosesində Araz Musayev də zərərçəkmiş qismində iştirak edib. Onun hüquqlarının müdafiəsini iki vəkil – Sevinc Həsənoğlu və Mehmet Said Gümüşbaş həyata keçirib.
Araz Musayevin bıçqalanmasında Uşu Sanda Federasiyasının prezidenti Azər Həsənsoy, Kikboks Federasiyasının 1-ci vitse-prezidenti Elşən Əbdürrəhimov, kikbosk üzrə məşqçi Vüqar Əsədov, Fuad Babayev, Rəşad Səlimov və Eynulla Babazadə təqsirləndirilir.
Prosesdə dövlət ittihamçısı müttəhimlərin istisnasız olaraq Araz Musayevin bıçaqlanmasında təqsirli olduqlarını bildirib və hakimdən onlara azadlıqdan məhrumetmə cəzası təyin etməsini istəyib.
Məhkəmədə həmçinin Araz Musayevin bıçaq zərbələri nəticəsində aldığı xəsarətlərin ağırlıq dərəcəsinin müəyyənləşdirilməsi üçün onun yenidən ekspertizaya göndərilməsi barədə qərar qəbul edilib.
Növbəti məhkəmə prosesi martın 2-nə təyin olunub.
Qeyd edək ki, Araz Musayev ötən ilin may ayında Türkiyənin Antalya şəhərində bıçaqlanıb
