Azərbaycan teatr sənəti xalqımızın mənəvi yaddaşının güzgüsüdür. Bu yaddaşda özünəməxsus yeri olan görkəmli sənətkar, teatr və kino aktyoru, teatr rejissoru, ssenarist, İrəvan Dövlət Azərbaycan Dram Teatrının direktoru, Azərbaycan Respublikasının əməkdar mədəniyyət işçisi, sənətşünaslıq üzrə fəlsəfə doktoru – İftixar Fərhad oğlu Piriyev 65 illik yubileyini qeyd edir.
İftixar müəllim illərdir ki, Azərbaycan teatrının bədii-estetik xəzinəsinə töhfələr verir. O, aktyor kimi tamaşaçı sevgisini qazanmış, rejissor və ssenarist kimi milli səhnəyə yeni nəfəs gətirmişdir. Onun quruluş verdiyi tamaşalar yalnız incəsənət hadisəsi deyil, həm də milli-mənəvi dəyərlərin təbliğidir.
Teatr direktoru kimi isə missiyası daha da böyüyüb – gənc aktyorların yetişməsinə şərait yaratmaq, səhnə ənənələrini qorumaq və inkişaf etdirmək, xalqı milli teatrla birləşdirmək.
İftixar müəllim yalnız səhnənin yox, həm də elmin adamıdır. O, sənətşünaslıq üzrə fəlsəfə doktoru olaraq teatr nəzəriyyəsinin dərin qatlarını araşdırmış, bu istiqamətdə elmi töhfələr vermişdir.
Onun zəhməti dövlət tərəfindən yüksək qiymətləndirilib. Əməkdar mədəniyyət işçisi adı İftixar müəllimin sənətə və xalqa xidmət yolunun rəsmi təsdiqidir.
Hörmətli İftixar müəllim!
Sizi ömrünüzün 65 illik yubileyi münasibətilə ürəkdən təbrik edirəm. Sizin həyat və yaradıcılıq yolunuz sənət eşqi, səhnəyə sədaqət və xalqınıza olan sevgiylə doludur. Siz yalnız Azərbaycan teatrına deyil, həm də bütün mədəniyyətimizə xidmət edən bir məktəb yaratmısınız.
Sizə möhkəm cansağlığı, yeni yaradıcılıq uğurları və uzun ömür arzulayıram. Yubileyiniz mübarək olsun!
Səadət Şükürova
Azİz təşkilatının vitse-prezidenti,
“Dona Qrasiya” Diplomatiya Mərkəzinin sədri
