Arıqladan çaylar və yaxud qadınların ölüm kabusu - Farmakoloq sirrləri açdı
"Sibutramin"dən ölüm halları da ola bilər".
Bunu 1xeber.media açıqlamasında tibbi ekspert, farmokoloq Müşfiq Hüseynov Azərbaycana gətirilən "arıqlama çay və qəhvə"lərin satışının dayandırılması ilə bağlı məlumata aydınlıq gətirərkən deyib.
Müşfiq Hüseynov bildirib ki, intelektual cəhətdən o qədər də yüksək səviyyəli ölkələrdə insanlar nəticəni çox tez gözləyirlər:
"Onu ucuz və tez zamanda əldə etməyin müxtəlif yollarını axtarırlar. Bu da "iş adam"larını, yəni daha çox işbazları bu mentalitetdən yararlanmağa təşviq edir. Adı çəkilən preparat - "sibutramin” arıqlama formulası üzrə təsir edən qadağan olunmuş preparatların sadəcə biridir. Ümumiyyətlə, bu tip preparatların tərkibində ya "sibutramine", ya da "ksenikal" olur".
Farmokoloq əlavə edib ki, dünyanın bir çox yerlərində "sibutramin"in qadağan olunmasının əsas səbəbi insanın beyninə təsir etməsi və beyindəki acılıq mərkəzlərini bloklamasıdır:
"Nəticədə insan sadəcə olaraq yemək istəmir. Bu tip dərmanların beyinə təsir etməsi zamanı müxtəlif psixoloji, gərgin vəiyyətlər yaranması ilə yanaşı, hətta çox ağır fəsad verən vəziyyətlərə gətirib çıxarda bilər. Hətta praktikada "sibutramin"dən ölüm halları belə var. Ona görə də bunu qadağan ediblər. İnsanlara bazarda təklif edilən qəhvə, çay və bu tip başqa məhsulların tərkibində "sibutramin" olmasa onun heç bir effekti olmaz. İnsanlar ona görə bu məhsulları - qəhvə, cay, kapsul da ola bilər içib, nəticədə 7- 10, bəzən 15 kiloqrama kimi arıqlayanda düşünürlər ki, bu məsulun effekti tez və qarantiyalıdır. Bu zaman onun beyinə verdiyi fəsadları çox adam fikirləşmək istəmir. Bunun qadağan olunması normal haldır".
Müşfiq Hüseynov deyib ki, bu addım çoxdan atılmalı idi:
"Son zamanlar qida əlavələri bazarında yaranmağa başlamış qayda-qanunun böyük rolu var. İyul ayından başlayaraq həm AQTA, həm də Analitik Ekspertiza Mərkəzi tərəfindən ölkəyə gətirilən qida əlavələrinin tərkibi ciddi yoxlamadan keçir. Nəticədə bu gün bazarda olan qida əlavələrinin- qəhvə, çayı da saysaq 100/ 90 yararsız vəziyyətdədir. Azərbaycan bazarı dünyanın ən bərdab bazarlarından biridir. Çünkü zamanında əllərinə nə gəldi gətiriblər. Onlar satılıb qurtarana kimi belə olacaq. Buna görə bəzi orqanların boynuna böyük yük düşür".
Müşfiq Hüseynovun sözlərinə görə, iki il bundan əvvəl bazarda müxtəlif qida əlavəsi adı altında kişi cinsi aktivliyini artıran tablet, kapsul, məcun, çay və müxtəlif məhsullar satılırdı:
"Əksəriyyətinin tərkibində də kimyasal qarışıqlıqlar vardı. Son zamanlar bunun qarşısı alınıb və insanlar nəhayyət ki, təmizlənməsini görəcəklər. Bazarda belə məhsullar tapılıb araşdırılmalıdır. Saxta məhsulların ölkəyə gətirilməsinin qarşısını almaq qeyri-mümkündür. 2026-ci ilin yayından etibarən bazarda təmizlənməni gözləyirəm".
Xatırladaq ki, Səhiyyə Nazirliyi və Dövlət Gömrük Komitəsinin birgə məlumatına görə, son dövrlər elektron ticarət yolu ilə kütləvi formada Azərbaycana gətirilən "arıqlama çayı və qəhvələri" qadağan edilib. Buna səbəb qeyd olunan məhsulların tərkibində bir sıra hallarda güclü təsirə malik maddə hesab edilən "sibutramin" maddəsinin olduğu aşkar edilib.
