İtaliyanın gündəlik qəzeti "Il Foglio" dünyada ilk dəfə tamamilə süni intellekt tərəfindən hazırlanmış xüsusi buraxılışını oxucularına təqdim edib.
1xeber.media "The Guardian"a istinadən xəbər verir ki, qzetin baş redaktoru Klaudio Çerazanın sözlərinə görə, mühafizəkar-liberal yönlü bu nəşr süni intellekt texnologiyasının iş prinsiplərinə təsirini nümayiş etdirmək məqsədi daşıyan və bir ay davam edən jurnalist eksperimentinin bir hissəsidir.
Dörd səhifədən ibarət "Il Foglio AI" qəzeti 18 mart tarixindən etibarən qəzet köşklərində və internetdə əlçatan olub. Çeraza layihə barədə bunları bildirib:
"Bu, tamamilə süni intellekt vasitəsilə yaradılan və qəzet köşklərində satışa çıxarılan dünyanın ilk gündəlik qəzeti olacaq. Biz hər şey üçün süni intellektdən istifadə etdik - məqalələr, başlıqlar, sitatlar, xülasələr... Hətta bəzən ironiya üçün belə. Jurnalistlərin rolu yalnız süni intellekt alətinə sual vermək və cavabları oxumaqla məhdudlaşdı".
Bu eksperiment, dünya mediasının süni intellektdən necə istifadə etməli olduğu ilə bağlı müzakirələrin getdiyi bir dövrdə həyata keçirilib. Məsələn, bu ayın əvvəlində "BBC News" oxuculara daha fərdiləşdirilmiş məzmun təqdim etmək üçün süni intellektdən istifadə edəcəyini açıqlamışdı.
Birinci səhifədə Tramp və Putin
"Il Foglio AI" qəzetinin ilk buraxılışının ön səhifəsində ABŞ-ın keçmiş prezidenti Donald Trampın siyasətinə dair məqalə yer alıb. Süni intellekt yazıda "İtalyan trampçıların paradoksu" adlandırdığı vəziyyəti izah edərək, İtaliyadakı Tramp tərəfdarlarının onun "ləğv mədəniyyətinə" (cancel culture) qarşı duruşunu dəstəklədiyini, lakin eyni zamanda "ABŞ-dakı ideallarının avtoritar liderlər kimi davranışlarını görməzdən gəldiklərini, hətta bəzən bunu alqışladıqlarını" vurğulayıb.
Ön səhifədə həmçinin "Putin, 10 xəyanət" başlıqlı bir köşə yazısı yer alıb. Məqalədə, Rusiya prezidenti Vladimir Putinin son 20 ildə yerinə yetirmədiyi vədlər, ləğv etdiyi müqavilələr və pozduğu razılaşmalar vurğulanıb.
Bundan başqa, İtaliya iqtisadiyyatı ilə bağlı nikbin proqnozlara yer verilən məqalə və İtaliyanın rəsmi statistika agentliyi "Istat"ın "gəlirin yenidən bölgüsü" mövzusundakı son hesabatı da qəzeti tamamlayan mövzulardan biridir. Hesabatda "ölkənin dəyişdiyi, lakin pisləşmədiyi", təxminən 750 min işçinin maaşlarının artırıldığı və gəlir vergisi islahatlarının müsbət təsir göstərdiyi bildirilib.
Gənclər münasibətlərdən qaçır
Qəzetin ikinci səhifəsində gənc avropalıların stabil münasibətlərdən niyə qaçdığı ilə bağlı məqalə yer alıb. "The Guardian" nəşrinin təhlillərinə əsasən, məqalələr xəbər janrında strukturlanmış, anlaşıqlı və aydın olub, ciddi qrammatik səhvlərə rast gəlinməyib. Lakin yazılarda heç bir insana birbaşa istinad edilmədiyi də qeyd edilib.
Son səhifədə isə süni intellekt tərəfindən yaradılmış oxucu məktubları təqdim edilib. "Oxuculardan redaktora" rubrikasında bir məktubda süni intellektin gələcəkdə insanları "lazımsız" hala gətirib-gətirməyəcəyi soruşulub. Süni intellekt isə buna belə cavab verib:
"Süni intellekt möhtəşəm bir yenilikdir, lakin hələlik hətta şəkəri səhv qoymadan qəhvə sifariş etməyi də bacarmır".
Baş redaktor Klaudio Çeraza "Il Foglio AI" qəzetinin "həqiqi bir qəzetin" bütün xüsusiyyətlərini əks etdirdiyini, "xəbərlər, müzakirələr və provokasiyalarla" dolu olduğunu vurğulayıb. Bununla yanaşı, layihənin süni intellektin praktikada necə işləyə biləcəyini yoxlamaq üçün bir test sahəsi olduğunu da əlavə edib.
Sonda isə Çeraza bu sözləri qeyd edib: "Bu, sadəcə 'intellekt' ilə hazırlanmış bir 'Il Foglio'dur, ona 'süni' deməyin".
