Rusiya Təhlükəsizlik Şurası sədrinin müavini Dmitri Medvedevin Ukraynanın böyük hissəsini əhatə edəcək "bufer zona” yaratmaqla bağlı hədəsi, hərbi analitiklərin fikrincə, reallıqdan uzaqdır.
1xeber.media xəbər verir ki, ABŞ-da yerləşən Müharibənin Öyrənilməsi İnstitutunun (ISW) hesablamalarına görə, bu planın həyata keçirilməsi Rusiya üçün onilliklər tələb edəcək və ölkə əhalisinin təqribən üçdə birinin hesabına başa gələ bilər.
Analitiklər bildirirlər ki, Medvedevin nəzərdə tutduğu "bufer zona" Ukraynanın 587 459 kvadrat kilometr ərazisini əhatə edir. 2025-ci ilin 1 yanvarından 24 mayına qədər Rusiya ordusu Ukraynada orta hesabla gündə 14,3 kv.km irəliləyə bilib.
ISW-nin təhlilinə görə, bu sürətlə Rusiya ordusunun Donetsk, Luqansk, Zaporojye və Xerson vilayətlərinin qalan hissəsini tamamilə işğal etməsi üçün təxminən 3,9 il, Medvedevin təklif etdiyi ölçüdə "bufer zona”nı tam reallaşdırması üçün isə 91 il vaxt lazım olacaq.
Bundan əlavə, ISW əvvəlki məlumatlara əsaslanaraq hesablayıb ki, Rusiyanın hücum əməliyyatları zamanı gündə orta hesabla 1500 nəfər itki verməsi nəzərə alınsa, bu plan 50 milyon əsgər, yəni ölkə əhalisinin təxminən üçdə biri qədər insan itkisi ilə nəticələnə bilər.
Qeyd olunub ki, bu hesablamalara Ukraynanın hələ işğal olunmamış 80 faizinin coğrafi və müdafiə baxımından yaratdığı çətinliklər, xüsusilə də Dnepr çayının ciddi maneə olması kimi amillər daxil edilməyib.
Daha əvvəl prezident Vladimir Putin də Rusiya-Ukrayna sərhədi boyunca təhlükəsizlik üçün "bufer zona” yaradıldığını bəyan etmişdi. O bildirmişdi ki, Rusiya ordusu bu istiqamətdə artıq fəaliyyət göstərir.
Ukraynadakı "Strategiya XXI” Qlobal Araşdırmalar Mərkəzinin təhlükəsizlik proqramlarının rəhbəri Pavel Lakiyçuk isə bildirib ki, bu bəyanatlar Rusiya rəhbərliyinin qarşısında dayanan strateji dilemma ilə bağlıdır. Əgər Rusiya ordusu strateji hücum planlarını davam etdirə bilməsə, o zaman "şimal istiqamətində bufer zona yaradılması” kimi məqsədə nail olduqlarını bəyan edərək qismən uğur görüntüsü yaratmağa çalışacaqlar.
Medvedevin hədə dolu açıqlamaları və ISW-nin reallığa əsaslanan təhlilləri Rusiya rəhbərliyinin hazırda həm hərbi, həm də demoqrafik və strateji baxımdan çıxılmaz vəziyyətlə üz-üzə olduğunu bir daha göstərir
