Milli fəal Kərim İsmayılzadə Çaldıran savaşı bəhanəsi ilə Türklər arasında təfriqə yaratmaq cəhdlərinə sərt cavab verib.
1xeber.media xəbər verir ki, bu reaksiyanın əsas səbəbi İranın mühafizəkar ruhanilərindən Ayətullah Həsən Amuli (Həmədani) tərəfindən Azərbaycan və Türkiyə liderlərinin Çaldıran savaşı kontekstində təhqir edilməsidir.
Bu açıqlama İranın dövlət televiziya kanallarında yayımlandıqdan sonra, Güney və Quzey Azərbaycandan olan fəalların sərt etirazları ilə qarşılanıb.
Ayətullah Həsən Amuli çıxışı zamanı Azərbaycan və Türkiyə liderlərini Çaldıran savaşı ilə əlaqələndirərək, bu tarixi münaqişə üzərindən Türk dünyasının birliyini zəiflətməyə yönəlmiş ittihamlar səsləndirib. Onun bu sözləri həm Güney Azərbaycan milli fəallarında, həm də Quzey Azərbaycan ictimaiyyətində geniş etiraza səbəb olub. Ayətullahın bu açıqlamaları, Türk dünyasının milli iradəsinə qarşı yönəlmiş bir addım kimi qiymətləndirilib.
Güney Azərbaycanın tanınmış milli fəallarından olan Kərim İsmayılzadə, çıxışında belə cəhdlərin mahiyyətini açaraq, bu cür təxribatların Azərbaycan və Türkiyə arasındakı strateji tərəfdaşlıq və milli birliyə zərər verə bilməyəcəyini bildirib.
Həmin çıxışın videosunu da təqdim edirik:
Kərim İsmayılzadə Güney Azərbaycan milli hərəkatının tanınmış simalarından biridir. O, Türk dünyasının vahidliyinə və “Bütöv Azərbaycan” ideyasına sadiq bir dünya görüşünə malikdir. İsmayılzadə, İran rejiminin Güney Azərbaycan Türklərinə qarşı illərdir yürüdülən assimilyasiya siyasətinə qarşı açıq mövqe sərgiləyir və Türk birliyini gücləndirmək üçün çalışır.
Çaldıran savaşı kontekstində təfriqə yaratmaq istəyənlərə qarşı təkcə İsmayılzadə deyil, digər Güney Azərbaycan və Türkiyə fəalları da etiraz səslərini yüksəldiblər. Onlar bu cür addımların məqsədinin Türk dünyasında daxili ziddiyyətlər yaratmaq və İranın özünün siyasi maraqlarını irəli çəkmək olduğunu bildiriblər.
Sonda Kərim İsmayılzadə vurğulayıb:
“Türk dünyası artıq daxili təfriqələrə imkan verməyəcək qədər güclü və müdrikdir. Güneyli, Quzeyli bütün Azərbaycan Türkləri və Türkiyə liderliyi arasında münasibətlər qardaşlıq və strateji birliyin təcəssümüdür.”
Bu mövqe, Türk dünyasının birliyinə qarşı yönələn təxribatların qarşısını almaq və milli həmrəyliyi qorumaq baxımından böyük əhəmiyyət daşıyır.
Musavat.com arayış üçün bildirir ki, 1514-cü ildə baş vermiş Çaldıran savaşı Osmanlı Sultanı I Səlim ilə Səfəvi hökmdarı Şah İsmayıl arasında olub. Savaş, Osmanlıların hərbi üstünlüyü ilə nəticələnib və Anadoluda Osmanlı-Səfəvi sərhədlərinin müəyyənləşməsinə səbəb olub.
Lakin bu tarixi münaqişə, bəzi qruplar tərəfindən iki türk imperiyasının rəqabəti üzərindən nifaq toxumları səpmək, məzhəb ayrılıqları ilə Oğuz Türklərini bölmək məqsədilə təhrif olunaraq təqdim edilir.
