Azərbaycanda fevralın 12-də xüsusi müsadirə edilmiş əmlakların hərracı keçiriləcək.
Bu barədə Əmlak Məsələləri Dövlət Xidmətindən məlumat verilib.
Bildirilib ki, hərraca müxtəlif ərazilərdə yerləşən mənzillər, qeyri-yaşayış sahələri və torpaq sahələri çıxarılacaq.
Hərrac Bakı şəhəri və ölkənin bir sıra rayonlarını əhatə edəcək. Satışa çıxarılan əmlaklar və onların start qiymətləri aşağıdakı kimidir:
Bakı şəhəri üzrə:
Nizami rayonu: Əlif Hacıyev küçəsində yerləşən 154.9 kv.m-lik mənzil 255 000 manat start qiyməti ilə hərraca çıxarılır. Bu mənzil artıq ikinci dəfə təkrar satışa çıxarılır.
Yasamal rayonu: H.Zərdabi prospektində 95.51 kv.m sahəyə malik mənzil 171 000 manat qiymətlə hərraca təqdim edilir. Bu əmlak üçüncü dəfə təkrar hərraca çıxarılır və əvvəlki satış qiymətinə 10% endirim tətbiq olunub.
Xətai rayonu: 2 ədəd Samsung Galaxy A3 markalı mobil telefon hər biri 120 manat start qiyməti ilə satışa çıxarılacaq. Bu telefonlar artıq beş dəfədən çox hərraca təqdim edildiyindən 50% endirim tətbiq edilib.
Regionlar üzrə:
Gədəbəy rayonu: S.Vurğun küçəsində, “Köhnə bazar” adlanan ərazidə yerləşən 70 kv.m qeyri-yaşayış sahəsi 10 000 manat start qiyməti ilə hərraca çıxarılır. Əmlak üçün 50% endirim nəzərdə tutulub.
Goranboy rayonu: Aşağı Ağcakənd qəsəbəsində yerləşən müxtəlif ölçülü torpaq sahələri satışa çıxarılıb. Qiymətlər 3 750 manatdan 11 000 manatadək dəyişir və bütün torpaq sahələrinə 50% endirim tətbiq olunub.
Xızı rayonu: Qızılqazma kəndində yerləşən 150 kv.m sahəsi olan bağ evi 75 000 manat, M.Müşviq küçəsindəki 200 kv.m fərdi yaşayış evi isə 80 000 manat start qiyməti ilə satışa çıxarılır. Hər iki əmlak üçün də 50% endirim nəzərdə tutulub.
Hərracda iştirak qaydaları:
Hərracda iştirak etmək istəyən fiziki və hüquqi şəxslər Əmlak Xidmətləri Məkanına müraciət edərək sifariş verməlidirlər.
İştirakçılar:
Satışa çıxarılan əmlakın ilkin satış qiymətinin 10%-i qədər beh ödəməlidirlər;
Hüquqi şəxslər üçün təsis sənədlərinin təsdiqlənmiş surətini təqdim etməlidirlər;
Fiziki şəxslər üçün şəxsiyyət vəsiqəsinin surəti tələb olunur;
Behin ödənildiyini təsdiq edən sənəd təqdim olunmalıdır.
Sifarişlər Bakı şəhəri, Nizami rayonu, Xəlil Rza Ulutürk küçəsi, 20 ünvanında yerləşən Əmlak Xidmətləri Məkanında hərracdan ən azı 3 bank günü əvvəl qəbul edilir.
Əlavə məlumat üçün əlaqə nömrəsi: 195-1.
Qeyd edək ki, hərrac zamanı iştirakçılar minimum hərrac addımı olaraq ilkin satış qiymətinin ən azı 1%-i qədər artırımla təklif verə bilərlər. Təkliflərin qəbul olunması ilə əmlak ən yüksək məbləği təklif edən şəxsə satılacaq.(Musavat.com)
