Rusiya və İran Ermənistanın maraqlarından yan keçməklə ikitərəfli əməkdaşlıq planları qurur. Əsas yer Azərbaycana ayrılır ki, bunun daha bir bariz nümunəsi Rusiya ilə İran arasında ildə 55 milyard kubmetr təbii qaz tədarükü üçün nəzərdə tutulan yeni qaz kəməri layihəsinin elan edilməsidir.
1xeber.media xəbər verir ki, bu fikri Ankara Avrasiya Araşdırmaları Mərkəzinin (AVİM) analitiki Tuğçe Tecimer bildirib.
Ekspert Rusiya Prezidenti Vladimir Putin və onun iranlı həmkarı Məsud Pezeşkian arasında bu yaxınlarda aparılmış danışıqları xatırladıb. Bu görüşdə digər məsələlərlə yanaşı, Qərbin sanksiyaları fonunda əməkdaşlığın enerji aspekti də müzakirə olunub.
AVİM analitiki qeyd edib: “Regionda yeni böyük enerji layihəsinin Ermənistanın iştirakı olmadan həyata keçirilməsi bir sıra suallar doğurur. Ermənistanın xarici işlər naziri Ararat Mirzoyanın Moskva ilə Tehran arasında strateji tərəfdaşlığın bütün regiona müsbət təsir edəcəyi barədə bəyanatı reallığı dəyişmir. Ermənistan əlverişsiz vəziyyətdədir”.
Ekspertin sözlərinə görə, İrəvanla Moskva arasında münasibətlərin soyumasını və Ermənistan hakimiyyətinin Qərblə yaxınlaşmasını nəzərə alaraq demək olar ki, regional layihənin növbəti marşrutunu müəyyənləşdirən Rusiya Ermənistana məhəl qoymayaraq, faktiki olaraq, bu ölkəyə xəbərdarlıq edib.
“Belə bir şəraitdə Rusiya və İran Qərbdən təzyiqlərin artacağı təqdirdə alternativ yaradırlar, Ermənistan isə iki gücün geosiyasi planlarından kənarda qalır”, - deyən Tecimer bildirib ki, Azərbaycandan keçəcək yeni qaz kəməri sayəsində “mavi yanacaq” ehtiyatlarına görə dünyada ikinci ölkə sayılan İranın öz resurslarından da istifadə etmək mümkün olacaq.
