Bakıda yollardakı sıxlığın əsas səbəblərindən biri məktəb və universitetlərin dərs saatlarının eyni vaxtda başlamasıdır.
Bu sözləri açıqlamasında təhsil eksperti Kamran Əsədov deyib.
Ekspert bildirib ki, nəqliyyat sıxlığının azaldılması üçün ən effektiv üsullardan biri dərslərin başlanma saatlarının mərhələli şəkildə dəyişdirilməsidir:
“Hazırda paytaxtda səhər saat 07:30-dan 09:30-a qədər olan dövrdə nəqliyyat sıxlığı ən yüksək həddə çatır və bu saatlarda əsas magistral yollarda və metro stansiyalarında sərnişin axını 35-40% artır. Metro istifadəçilərinin böyük hissəsini tələbələr və məktəblilər təşkil edir.
Düşünürəm ki, şəhərin mərkəzində yerləşən universitetlərdə dərslərin saat 10:00-da, şəhərətrafı və kənar rayonlarda isə saat 08:00-da başlaması nəqliyyat yükünü balanslaşdıra bilər. Ancaq universitetlərin dərs saatlarının dəyişdirilməsi yalnız ali təhsil müəssisələrinin daxili qərarı ilə deyil, nəqliyyat qurumları ilə koordinasiyalı şəkildə həyata keçirilməlidir. Metro və avtobusların hərəkət cədvəlləri universitetlərin yeni dərs saatlarına uyğun tənzimlənməlidir”.
Kamran Əsədov analoji təcrübənin digər ölkələrdə tətbiq edildiyini xatırladıb:
“Məsələn, Türkiyənin böyük şəhərlərində universitetlərin dərs saatları müxtəlif vaxtlara bölünür və nəqliyyat axını tənzimlənir. İstanbul, Ankara və İzmir kimi şəhərlərdə bəzi universitetlərdə dərslərin fərqli saatlarda başlaması tələbələrin eyni vaxtda metro və avtobuslardan istifadə etməsinin qarşısını alır və nəqliyyat yükünü daha bərabər şəkildə paylayır.
ABŞ-da tələbələrə öz dərs cədvəllərini müəyyən dərəcədə seçmək imkanı verilir, bu da nəqliyyat axınının tənzimlənməsinə kömək edir. Sinqapur və Yaponiya kimi sıx nəqliyyat axınına malik ölkələrdə universitetlər və məktəblər fərqli saatlarda fəaliyyət göstərir ki, bu da səhər saatlarında yükün azalmasına səbəb olur”.
Qeyd edək ki, Prezident İlham Əliyev “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nı təsdiq edib. Dövlət Proqramının həyata keçirilməsinə dair Tədbirlər Planında yer alan məsələlərdən biri də təhsil müəssisələri ilə bağlıdır.
Belə ki, Proqramda Bakı şəhərində yerləşən təhsil müəssisələrinin fəaliyyətinin şəhərin nəqliyyat sıxlığına təsirinin qiymətləndirilməsi və müvafiq təkliflərin hazırlanması qeyd olunub.
axar.az
