ABŞ-ın San-Fransisko şəhərində yaşayan multimilyonçu Silviya Kanq var-dövlətin həyatını çətinləşdirdiyini və onu dostlarından uzaq saldığınetiraf edib.
1xeber.media bu barədə "Business Insider"ə istinadən xəbər verir.
2018-ci ildə "Mira" adlı tibbi startapın əsasını qoyan Kanq COVID-19 pandemiyası zamanı biznesinin sürətlə inkişaf etdiyini bildirib. Buna baxmayaraq, o, sadə həyat tərzi sürməyə üstünlük verir və orta sinif üçün nəzərdə tutulmuş bir rayonda, üç otaqlı evdə əri və oğlu ilə birlikdə yaşayır.
"Mən "Tesla Model 3" sürürəm, amma bu, daha çox rahatlıq üçündür, dəbdəbə üçün deyil - pilotsuz idarəetmə həyatımı asanlaşdırır", deyə o bildirib.
Qadın dostlarının onunla görüşlərə əvvəlkindən daha çox hazırlaşdıqlarını, gündəlik problemlərinə diqqət yetirməyin isə onun üçün çətinləşdiyini qeyd edib. Bunun səbəbi işinə tamamilə fokuslanmasıdır ki, bu da dostları ilə əvvəlki münasibətləri qorumağı çətinləşdirir.
Psixoloqlar ona ünsiyyət dairəsini genişləndirməyi məsləhət görüblər. İndi Kanq ortaq maraqlara və hobbilərə əsaslanan yeni dostluqlar qurur. Bundan əlavə, o, daim mentorları və sahibkar həmkarlarından biznes məsləhətləri alır.
Maddi cəhətdən tam müstəqil olmasına baxmayaraq, Kanq hələ də işindən məmnunluq duyduğunu vurğulayıb. Onun prioritetləri təkcə maddi imkanlarla məhdudlaşmır, həm də ona sevinc gətirən fəaliyyətləri - səyahət və tarixi yerləri öyrənməyi əhatə edir.
