ABŞ Konqresinin Nümayəndələr Palatasının Demokrat Partiyasının üzvü Al Qrin Amerika lideri Donald Trampın impiçmentinin müzakirəsini təklif edəcək.
1xeber.media xəbər verir ki, siyasətçi bu barədə qanunverici orqanın rəsmi saytında yayımlanan iclasında bildirib.
“Prezident Trampın impiçmenti üzrə iş artıq başlayıb. Mən elan edirəm ki, mən onun çirkin təkliflərinə və alçaq hərəkətlərinə görə ona qarşı impiçment qanun layihəsi təqdim edəcəyəm”, - konqresmen qeyd edib.
Qrin hesab edir ki, Tramp Qəzza zolağı ilə bağlı son açıqlamalarına görə hakimiyyətdən uzaqlaşdırılmağa layiqdir.
Bundan əvvəl Donald Tramp İsrailin baş naziri Benyamin Netanyahu ilə danışıqlar zamanı Qəzza sakinlərinin Misir və İordaniyaya köçürülməsini təklif edib. Siyasətçi qeyd edib ki, ölkələrin hakimiyyət orqanları hazırda fələstinliləri qəbul etməkdən imtina edir, lakin sonda razılaşacaqlarına əminlik ifadə edib.
Bundan əlavə, respublikaçı qeyd edib ki, ABŞ Qəzza zolağına nəzarəti ələ keçirməyə, onu partlamamış hərbi sursatlardan təmizləməyə, ərazini hamarlaşdırmağa və dağılmış binaları sökməyə hazırdır.
