Bir müddət öncə, üçüncü dəfə insult keçirən tanınmış vəkil Əsabəli Mustafayevin müalicələri davam edir.
Bu barədə onun həyat yoldaşı Zemfira Mustafayeva məlumat verib.
“Səhhətində əvvəlkinə nisbətən irəliləyişlər var. Nitqində yaranan problem azalıb. Danışır, fikrini çatdıra bilir. İki gün öncə yenidən MRT ilə yoxladılar. Dedilər ki, üçüncü ocaq yaranıb. Tam işə çıxa bilmir, çünki hələ müalicəsi davam etməlidir. Həkimlər deyiblər işlə çox yüklənə bilməz. Hazırda evdədir. Dostları, jurnalistlər zəng edib maraqlanırlar.
Hər kəsə təşəkkür edirik. Əsabəli Mustafayev 42 ildir ki, həyat yoldaşımdır. Müxtəlif vəzifələrdə işləyib, amma heç vaxt fikirləşməmişəm ki, onu bu qədər sevən var. Hətta özüm də məəttəl qalıram. Deyirəm ki, səni nə qədər çox istəyirlər. Həmişə deyirəm, kaş oğlum da xasiyyətində ona oxşayardı. Heç vaxt heç kimdən imtina etməyib, düşünməyib ki, pul, var-dövlət olsun. Pulun arxasınca qaçmayıb, həmişə insanların yanında olub, dəstək göstərib. Hətta gecə saat ikidə də zəng edəndə danışır. Hərdən deyirəm ki, səndə səbir var. O isə deyir ki, mənə müraciət edirsə, deməli, ehtiyacı var”, - o bildirib.
