Nikol Paşinyan Feysbukda maraqlı bir məqalə dərc edib. Güclü məqalə sayılmaz, sadəcə məlum bir həqiqəti – “hər bir ölkənin özünümüdafiə hüququ var” fikrini təkrarlayır. Bəlkə bu mövzu Ermənistanın hərbi müqavilələrinə görə Azərbaycanın narazılığını ilk dəfə ifadə etdiyi vaxtda qaldırılsaydı, o zaman məqalə daha aktual və güclü görünərdi. İndi təkrarçılıqdır. Lakin məqalədə diqqət çəkən əsas fikir başqadır: Paşinyan qeyd edir ki, Ermənistan inamla iddia edir ki, Bakıda keçirilən məhkəmə prosesi səhnələşdirilib.
1xeber.media xəbər verir ki, bu fikirləri erməni bloger İşxan Verdyan bildirib.
Onun sözlərinə görə, Paşinyanın məhkəmə ilə bağlı bu qeydi onun “Azərbaycanla sülh yolundan dönməyəcək” fikri ilə uzlaşmır:
“Bakıda keçirilən məhkəmə ilə bağlı Paşinyanın dilindən əvvəllər də belə fikirlər səslənib, lakin indi bu sözlər rəsmi bir məqalədə ifadə olunub. Adətən ölkə rəhbərlərinin məqalələri əsas məna daşıyır və tez-tez sitat gətirilir, hətta müəllif artıq ölkənin rəhbəri olmayanda belə. İndi belə anlaşılır ki, Paşinyan Azərbaycan tərəfindən Qarabağ klanının rəhbərlərinin məhkəməsini qeyri-qanuni adlandırmaq fikrini sabitləşdirir.
Amma mən sual verirəm: Nikol Paşinyan həqiqətən başa düşmür ki, bu addımı ilə o, İlham Əliyevlə açıq ziddiyyətə gedir? Axı hazırda bu məhkəmə prosesi Əliyevin əsas siyasi prioritetidir. Belə olan halda Paşinyan Əliyevin məhkəməsini qeyri-qanuni adlandıraraq sülh sazişini necə imzalayacaq? Düşünürsünüz ki, Əliyev bunu eşitmir?
Bağışlayın, amma bu Paşinyanın bəyanatı hüquqi deyil, siyasi xarakter daşıyır. Əgər yanılıramsa, deyin görək, cənab Paşinyanın hansı arqumentləri var? O, proseduru, ittihamları və ya məhkəmə heyətini hüquqi cəhətdən əsaslı şəkildə mübahisə edir? Xeyr! O, sadəcə, Azərbaycanda ədalətli məhkəmə ehtimalını mübahisələndirir. O, Azərbaycanın məhkəmə sistemini və onun subyektivliyini mübahisələndirir, amma müstəqil, savadlı hüquqşünaslar tərəfindən ciddiyə alınacaq heç bir arqument gətirmir.
Ən maraqlısı isə odur ki, Paşinyan bunu bir məqalədə edir. O məqalə ki, gələcəkdə də sitat gətiriləcək və artıq “yanılmışam” demək kifayət etməyəcək”.
Verdyan hesab edir ki, Paşinyan bu fikirləri bilərəkdən səsləndirib:
“Bəs o, bunu niyə edir? O, həqiqətən, yuxarıda sadaladığım məqamları anlamırmı? Yaxşı, bəlkə də bəzi şeyləri anlamır. Amma İlham Əliyevin belə bir atmosferdə sülh sazişini imzalamayacağını başa düşməlidir, elə deyilmi?
Bəs o zaman niyə belə edir? Niyə bu mövqeyini möhkəmləndirir və Azərbaycanın məhkəməsini qeyri-qanuni adlandırır? Məndə bu məsələyə dair bir şübhə var:
Düşünürəm ki, ABŞ ona vəd edib ki, beynəlxalq ictimaiyyət Bakının məhkəmə qərarlarını tanımayacaq və onların heç bir əhəmiyyəti olmayacaq. Bu səbəbdən Paşinyana məhkəməni sadəcə görməzlikdən gəlmək və həyatına davam etmək tövsiyə olunub. Bilirsiniz, əgər belə bir şey deyilibsə, amerikalılar əslində çox haqlıdırlar. Axı onların əlində dünya mediasına təsir etmək üçün kifayət qədər vasitələr var. Onlar müasir dövrün bütün informasiya sahələrinə, o cümlədən süni intellekt sistemlərinə nəzarət edirlər. Onlar Bakının məhkəmə qərarlarını sadəcə unudulmağa tərk edə bilərlər.
Amma əsas məsələ odur ki, bunu bacaracaqlarmı? Azərbaycanın hazırkı siyasətini və mövqeyini nəzərə alaraq düşünürəm ki, bu, çox çətin olacaq”.
Blogerin fikrincə, Ermənistan baş naziri məhkəmə ilə bağlı həqiqətən belə düşünürsə, o zaman Türkiyə ilə gələcək münasibətlərini və ölkənin iqtisadi azadlığını da sual altına qoyur:
“Bununla belə, Paşinyan özünə başqa bir sual verməlidir: Bu məhkəmə prosesi Ankarada necə qarşılanacaq? Və Ermənistanın Türkiyə ilə münasibətləri normallaşdırmaq istədiyi bir vaxtda bu mövqe necə görünəcək? Bu, Ermənistana necə təsir edəcək? Və Paşinyanın öz siyasi gələcəyi üçün nə demək olacaq? Bu suallar tamamilə məntiqlidir, elə deyilmi?
Yaxşı, fərz edək ki, Bakının məhkəmə prosesi həqiqətən şübhəlidir, Türkiyə isə avtoritar rejimdir. Amma Ermənistan bu iki ölkə arasında sıxışıb qalıb və nəticədə bu iki ölkə Paşinyan üçün iqtisadi diversifikasiya və Rusiyadan asılılığı azaltmaq üçün yeganə fürsət yaradır.
Ermənistanda səhvən düşünürlər ki, Rusiyanın Ermənistana qarşı tətbiq edə biləcəyi iqtisadi sanksiyalar, sadəcə, Rusiya bazarında erməni konyakının yığışdırılması ilə nəticələnəcək. Ola bilər ki, konyak bazarda olmasın, amma qarşılığında Rusiya Ermənistanı çörək, yağ, şəkər, benzin, qaz, elektrik enerjisi, internet və digər həyati vacib məhsullardan məhrum edə bilər. Çünki bu gün Ermənistanın ərzaq təhlükəsizliyi tamamilə Rusiyadan asılıdır.
Bunu dəyişmək mümkün olmayacaq - əgər Paşinyan heç olmasa İlham Əliyevlə dialoqa cəhd etməsə. Yaxud ən azından onu dinləməyə çalışmasa”.
