Azərbaycanın bölgələrindən paytaxta və Bakıətrafı ərazilərə edilən axın bir çox rayonlarda kəndlərin boşalmasına səbəb olub. Bu proses eyni zamanda kənd təsərrüfatında çalışanların azalmasına yol açıb. İnsanların rahat həyat arxasında şəhərə üz tutması son nəticədə paytaxtı da bir sıra problemlə üz-üzə qoyub, məsələn, həddindən artıq sıxlıq yaranıb, yollarda tıxaclar artıb və s.
Bəs prosesi əksinə döndərmək mümkündürmü? Başqa sözlə, kəndlini şəhərlərdən öz yerinə qaytarmağın yolları varmı?
Mövzu ilə bağlı Modern.az-a danışan Milli Məclisin Aqrar siyasət komitəsinin sədri Tahir Rzayev bildirib ki, gənclərin kəndlərdən şəhərə axını nəinki Azərbaycanda, dünyada son illər müşahidə edilən haldır:
“Bu ilk növbədə gəncliyin coşğunluğundan, onların daha rahat həyat axtarmasından irəli gəlir. Ancaq çox təəssüflər olsun ki, əksər hallarda bu rahat, xoşbəxt həyat təmin oluna bilmir. Çünki orta məktəbi bitirən gənc işləmək üçün şəhərə üz tutur. Onun burada evi, işləmək üçün yeri yoxdur, digər imkanları məhduddur. Az bir müddətdə hissə qapılır və müəyyən xətalara yol verir, nəticədə cəmiyyətdəki nüfuzunu, yerini itirmiş olur”.
T.Rzayevin sözlərinə görə, bu gün Azərbaycan kəndi tamamilə öz simasını dəyişib:
“Regionların sosial-iqtisadi inkişafına dair dövlət proqlarının uğurla həyata keçirilməsi, ərazilərin abadlaşdırılması və çox mühüm infrastruktur layihələrin təmin edilməsi kənddə mənalı həyat qurmağa və yaşamağa imkanlar yaradır. Sözsüz ki, artıq sosializm cəmiyyəti deyil, bu gün kəndlinin ən başlıca vəzifəsi özünün təsərrüfatını yaratmaq, kənd təsərrüfatı ilə məşğul olmaqdır. Əgər şəxs peşə sahibidirsə, öz ixtisası ilə məşğul olmalıdır. Amma orta təhsilli, müəyyən ixtisasa yiyələnməyən gənclər təsərrüfatda qalıb işləməlidirlər. Kəndlərdə hər kəsin ailəsi üçün pay torpaqları ayrılır, icarəyə torpaqlar verilir. Hər kəs bundan istifadə edə bilər. Ancaq açıq deyilməlidir ki, əvvəlki illərdən fərqli olaraq indiki gənclər bilavasitə əməkdən uzaq durmağı üstün tuturlar, işləməkdən, zəhmətə qatlaşmaqdan çəkinirlər. Şəhərin yaraşığı onları daha çox cəlb edir. Ancaq bu uğurlu bir seçim deyil, çünki şəhərdə sıxlıqdır, yüksək ixtisaslı kadrlara, onların peşəkarlığına üstünlük verilir və orta təhsilli, peşəkarlığı yüksək olmayan gənclərin şəhərdə mövqe tutması, iş yeri tapması, uğur qazanması çox çətindir”.
Komitə sədri qeyd edib ki, insanların, o cümlədən gənclərin şəhərə axını kənd təsərrüfatına müəyyən təsirlər göstərib:
“Bu gün kənd təsərrüfatı sahələrində daha çox orta yaşlı və ahıl adamlar çalışırlar. Ancaq uzun müddət belə davam edə bilməz. Çünki yaşlıları gənc nəsil əvəz etməlidir. Gənclər yaşlılardan kənd təsərrüfatını idarə etmək üçün təcrübə öyrənməlidirlər, heyvandarlığın, əkinçiliyin, arıçılığın, taxılçılığın, pambıqçılığın sirlərinə yiyələnməlidirlər və öz həyatlarını qurmalıdırlar. Bir məsələ də qeyd olunmalıdır ki, son illər kəndə qayıdan şəxslərin sayında artım da müşahidə olunur. Şəhərdə iş tapmayan bir çox gənclər indi kəndlərimizdə qalıb işləməyi üstün tuturlar. Elə bilirəm bu məsələlərə ciddi diqqət yetirilməli və birinci növbədə gənclərlə söhbətlər aparılmalı, maarifləndirmə tədbirləri həyata keçirilməli, stimullaşdırıcı şərtlər, həvəsləndirmə metodu ön plana çəkilməlidir. Azərbaycan gəncliyi sağlamdır, mütərəqqidir, cəsarətlidir. Bu gün işğaldan azad olunmuş ərazilərə köçən, orada çalışan, o torpaqları abadlaşdıran gənclərimizin timsalında bunu biz aydın görürük. Sözsüz ki, dövlətin, hər bir vətəndaşımızın vəzifəsidir ki, gəncliyimizi sağlam ruhda tərbiyə etsin, onları düzgün istiqamətləndirsin, onların həyatının qurulmasına öz dəstəyini versin”.
