Bakıda ictimai nəqliyyatda onlayn ödənişlərlə bağlı çətinliklər sərnişinlərin narazılığına səbəb olub. Sərnişinlər bildirirlər ki, təmassız ödənişi dəstəkləyən NFC kartlardan istifadə imkanı yaradılmalıdır. Onların sözlərinə görə, bu sistem tətbiq olunsa, kartla ödəniş zamanı yaranan texniki problemlər azalacaq.
Azərbaycan Yerüstü Nəqliyyat Agentliyi (AYNA) məsələ ilə bağlı açıqlama verib. Qurumdan bildirilib ki, nağdsız ödəniş sisteminin genişləndirilməsi üçün işlər davam etdirilir. Paytaxtda sərnişindaşıma subyektlərində yeni ödəniş sisteminə keçid sürətləndirilir.
Qeyri-rəsmi məlumata görə, yaxın zamanda bu problemlərin həlli istiqamətində yeniliklər gözlənilir. Nağdsız ödənişlərin daha stabil və rahat işləməsi üçün texniki işlər aparılır.
Nəqliyyat eksperti Rauf Ağamirzəyev açıqlamasında qeyd edib ki, ödəniş sistemlərinin çeşidli olması yaxşı haldır: “Burada nə qədər çox çeşidimiz olarsa, o qədər minimum riskimiz olar. Bizdə hazırda Bakıkart və QR ödənişlərdir. Dünyanın fərqli ölkələrində NFC, üz tanıma kimi ödənişlər tətbiq olunur. Yəni burada bir yox bir neçə üsul tətbiq olunmalıdır. İndi zaman-zaman müzakirə olunan NFC-nin də üstünlükləri var. Bank kartları ilə təmassız ödənişlər tutulub. Bu da indiki vəziyyətdə hansısa hadisə olduqda ciddi alternativ formalaşdıracaq”.
Nəqliyyat ekperti Elməddin Muradlı isə deyir ki, NFC texnologiyaların tətbiqindən sonra sərnişin daşınmasında hər şeyin ideal olacağını deyə bilmərik: "Bu sadəcə ödəniş mexanizmidir. Metronun problemi bununla bitmir. Metronun qatarlarının sayı, interval və sıxlıq məsələsi insanları daha çox narahat edir. Bu problemlər həll olunandan sonra digər problemlərin həlli daha asandır".
O qeyd edib ki, texnologiyada problem qaçılmazdır, istənilən yenilik özü ilə müəyyən problemlər də gətirir:
“Bakıkart sisteminin özünə baxaq, nə qədər problem yaradıb?! Belə şeyləri əvvəlcədən proqnozlaşdırmaq çətin olur. Problemlərin olmasını istəmərik, amma texnologiyada belə hallar olur. Elə də ola bilər ki, heç bir problem olmasın. Bizim əsas problemimiz odur ki, bütün işləri xarici şirkətlər həyata keçirir. Bu boyda ödəniş sistemi qururuq amma Türkiyənin hansısa şirkəti qurur. Bakıkartın bu problemlə üzləşməsinin səbəbi də bu idi. Türkiyədə şirkət rəhbəri ilə şəriki arasında yaranan qalmaqal burada problemə səbəb oldu. Biz milyonların dövr etdiyi bir sistemi niyə bir yerdə cəmləşdiririk? Zəmanət yoxdur, qəflətən sıradan çıxır, insanlar problemlə üzləşir. Neçə gündür daşıyıcı şirkətlər deyir Bakıkart sistemdən çox pul çıxıb. Sistem işləmədiyi üçün təxmini pul çıxılıb. Daşıyıcı deyir Bakıkartın mənə borcu var, Bakıkart deyir daşıyıcının mənə borcu var. Hazırda daşıyıcılarla Bakıkart arasında mübahisə yaranıb”.
Ekspert bildirib ki, gələcəkdə bu cür sistemlər Azərbaycanın mütəxəssisləri tərəfindən qurulsa daha yaxşı olar:
“Bu məsələ elə tənzimlənməlidir ki, sistem Azərbaycanın öz əlində olsun. Eyni zamanda ictimai nəqliyyatın ödəniş sistemlərində də tənzimləmələr olmalıdır. Adam var avtobusla 10 kilometr yol gedir, o da eyni ödənişi verir, adam da var 2 dayanacaq gedir, o da eyni ödənişi edir. Gələcəkdə eyni zamanda əhalinin müxtəlif təbəqələri üçün güzəştlər nəzərdə tutulur. Bu məsələlər elə qaydada tənzimlənməlidir ki, dövlət ayın sonunda daşıyıcıya nə qədər ödəniş edəcəyini bilsin. Azərbaycanda bu işi bilənlər var, amma nədənsə xaricə qaçırıq. Məqsədin nə olduğun bilmirəm, amma bilirəm ki, o işi ölkəmizdə görə biləcək mütəxəsisslər var”.
modern.az
