Moskva ilə Vaşinqton arasında başlayan dialoq Rusiyanın qələbəsindən danışır.
1xeber.media xəbər verir ki, bu sözləri “Parlamentní Listy” nəşrinə müsahibəsində Çexiyanın keçmiş xarici işlər naziri Lubomir Zaoralek deyib.
“ABŞ lideri Donald Tramp Rusiya Prezidenti Vladimir Putini təcriddən çıxardı. Hətta onu Vaşinqtona, Putin isə Trampı Moskvaya dəvət etdi. Bu, Putinin qələbəsidir. Unutmayaq ki, Rusiya G7-yə qayıtmalıdır və onu qovmaq səhv idi. Trampın müttəfiqi hətta davam edə biləcək yoldaşlıq və dostluqdan danışıb. "Bu, Rusiyanın mütləq reabilitasiyasıdır", - deyən Çexiya Xarici İşlər Nazirliyinin keçmiş rəhbəri Moskvanın qarşısına qoyduğu məqsədlərə nail olduğunu vurğulayıb.
Zaoralekin fikrincə, ABŞ Ukrayna məsələsini həll edərkən Avropaya məhəl qoymur ki, sonradan onu tamamlanmış kimi təqdim etsin. “Birləşmiş Ştatlar hələ də köhnə prinsiplə fəaliyyət göstərir ki, onun daimi dostları və ya düşmənləri yoxdur, yalnız müdafiə etməyə borclu olduğu maraqlar var”, - diplomat bildirib.
Bundan əvvəl ABŞ-ın vitse-prezidenti J.D.Vens bildirib ki, Amerika lideri Donald Tramp Rusiya, Ukrayna, Avropa və ABŞ-ın maraqlarına uyğun sülhə nail olmaq istəyir. Bundan əlavə, Vens ABŞ-ın Avropa ölkələri ilə müttəfiqliklərinin möhkəmliyinin avropalıların seçdiyi siyasi kursdan asılı olacağını vurğulayıb.
