Martın 6-da Avropa İttifaqı Brüsseldə Ukrayna münaqişəsi və Avropanın müdafiəsi ilə bağlı dövlət və hökumət başçılarının fövqəladə sammitini keçirəcək.
Bu barədə TASS məlumat yayıb.
Aİ sözçüsü bildirib ki, yaxın vaxtlarda Avropa İttifaqı Şurasının nümayəndəsi Antonio Kostanın martın 6-da xüsusi iclas keçirəcəyi barədə məlumat veriləcək.
Xatırladaq ki, Britaniya hakimiyyəti də krallığın baş naziri Key Starmer ABŞ-dan qayıtdıqdan sonra Ukrayna üzrə Avropa liderlərinin sammitini keçirmək istədiyini elan edib.
Fevralın 17-də Fransa Prezidenti Emmanuel Makron təhlükəsizlik məsələləri üzrə Avropa İttifaqının fövqəladə sammitinin keçirilməsi təşəbbüsü ilə çıxış edib. Görüş bazar ertəsi Parisdə, Münhen Konfransından dərhal sonra baş tutub və burada ABŞ-ın vitse-prezidenti J.D.Vens açıq şəkildə bildirib ki, Aİ liderləri öz problemlərinə diqqət yetirməli, Vaşinqton isə Ukraynadakı vəziyyəti həll etmək üçün bir yol tapacaq.
Fransada keçirilən fövqəladə iclasda Avropa liderləri müdafiə xərclərinin artırılmasını dəstəkləsələr də, Ukraynada mümkün sülhməramlı missiya ilə bağlı razılığa gələ bilməyiblər. ABŞ və Rusiya arasında aparılan danışıqlar fonunda Avropada fikir ayrılıqları güclənib.
