Bakıda səfərdə olan Pakistan Baş naziri Məhəmməd Şahbaz Şərif bu gün Zəfər Parkını ziyarət edib. Burada ali qonağın şərəfinə fəxri qarovul dəstəsi düzülüb.
Baş nazirin Zəfər Parkını ziyarət etməsi və burada fəxri qarovul dəstəsinin düzülməsi maraqla qarşılanıb.
Qeyd edək ki, xarici dövlət başçılarının və yüksək rütbəli rəsmilərin Bakıya rəsmi səfərləri zamanı xüsusi protokol qaydalarına uyğun olaraq bir sıra tarixi və strateji əhəmiyyətli məkanlar ziyarət edilir. Azərbaycan protokol praktikasına əsasən, Şəhidlər Xiyabanı, Fəxri Xiyaban, rəsmi iqamətgahlar və Heydər Əliyev Mərkəzi kimi məkanlar xarici liderlərin səfər proqramına daxil edilir.
Şahbaz Şərifin Zəfər Parkını ziyarət etməsi buranın da artıq bu siyahıya əlavə olunduğunu göstərir.
Modern.az-a açıqlamasında Milli Məclisin deputatı Azər Badamov söyləyib ki, Şahbaz Şərifin ölkəmizə səfəri çərçivəsində Zəfər Parkını ziyarət etməsi və ziyarət mərasimin fəxri qaravolla müşayiət olunması ölkələrimiz arası münasibətlərin yüksək səviyyəsini göstərir".
A.Badamov qeyd edib ki, digər xarici dövlət başçılarının ölkəmizə rəsmi səfərləri çərçivəsində Zəfər Parkına ziyarətini protokola salmaq olar:
"Çünki, bizim zəfərimizi həzm etmək istəməyən ölkələrin dövlət başçılarının ölkəmizə rəsmi səfərinin də mənası yoxdur".
Qeyd edək ki, Zəfər Park 8 noyabr 2024-cü ildə açılıb. Açılış mərasimində Prezident İlham Əliyev, birinci xanım Mehriban Əliyeva və oğulları Heydər Əliyev iştirak ediblər.
Paytaxtın 8 Noyabr prospektində inşa olunan Zəfər parkının ərazisi 10 hektara yaxındır. Parkın girişində 44 günlük Vətən müharibəsinin rəmzi kimi hündürlüyü 44 metr, eni 22 metr, sütunlarının sayı 44 olan Zəfər tağı inşa edilib.
Parka keçid hissədə 8 Noyabr - Zəfər Gününü əks etdirən memorial abidə ucaldılıb. Abidə Zəfər Gününü və sarsılmaz birliyi təcəssüm etdirir. Memorial abidənin ətrafında Qarabağ xalçalarındakı naxış və bəzək elementlərini əks etdirən yaşıllıq salınıb. Torpaqlarımızın azad olunması uğrunda tarixi Qələbəyə gedən yolu, Vətən müharibəsində qəhrəmancasına döyüşmüş əsgər və zabitlərimizin, bütün şəhidlərimizin xatirəsini yaşatmaq məqsədilə parkın ərazisində Zəfər muzeyi də yaradılır. Qurulmaqda olan Zəfər muzeyinə park ərazisindən iki istiqamətdə giriş olacaq. Muzeydə Vətən müharibəsi şəhidlərinin hər birinin adı həkk olunacaq, burada toplanacaq eksponatlar ərazilərimizin işğaldan azad olunması uğrunda mübarizə aparan əsgər və zabitlərimizin igidliyini, xalqımızın əzmini nümayiş etdirəcək.
Zəfər parkında, həmçinin tematik bağça, kaskad tipli şəlalə, Qarabağ yaddaş bağçası və parka ümumi baxış nöqtəsi yaradılıb. Yaddaş bağçasının ətrafında istirahət guşələri salınıb. Parkın sonunda Azadlıq Bayrağı Meydanı inşa olunub.
