ABŞ prezidenti Donald Tramp fransalı həmkarı Emmanuel Makronla Ağ Evdə görüşüb.
1xeber.media xəbər verir ki, Tramp görüşdən sonra jurnalistlərin suallarını cavablandırıb.
O, Ukrayna ilə bağlı sülh sazişi üzrə danışıqların necə irəlilədiyini açıqlayıb.
Tramp deyib ki, ABŞ və Rusiya arasında danışıqlar çox yaxşı gedir, tərəflər irəliləyiş əldə ediblər.
Onun sözlərinə görə, Ukraynadakı münaqişə bir neçə həftə ərzində həll oluna bilər: "ABŞ Ukraynadakı münaqişənin Üçüncü Dünya Müharibəsinə çevrilməsinin qarşısını almağa niyyətlidir".
Tramp qeyd edib ki, münaqişənin həllindən sonra Ukraynanın təhlükəsizliyi Avropa ölkələrinin üzərinə düşəcək. O əlavə edib ki, Avropa ölkələri Ukraynada sülhməramlı qoşunlar yerləşdirə bilər.
"Vaşinqton və Moskva iqtisadi inkişafla bağlı böyük sazişlər üzərində ciddi danışıqlar aparır və bu prosesə Vladimir Putin də daxildir", - ABŞ Prezidenti qeyd edib.
Trampın Putinlə görüşmək niyyətindədir və bu məsələ üzrə təfərrüatlar üzərində işlənir. Ukrayna münaqişəsi həll olunsa, o, Moskva səfəri etməyi planlaşdırır.
ABŞ prezidenti yaxın müddətdə Zelenski ilə görüşmək niyyətindədir və bu görüşdə nadir metallar haqqında saziş imzalana bilər. O deyib ki, sazişin yalnız Zelenskinin imzası ilə kifayətlənmək olmaz, bunun üçün Ali Radanın təsdiqi lazımdır.
