Lombard kreditləri ilə bağlı narazılıqlar davam edir. Əksəriyyət düşünür ki, girov qoyulan qızıl əşyalarına çox aşağı qiymət təklif olunur. Bu, onların borclarını qarşılamır. Bildirilir ki, bankların təqdim etdiyi lombard kreditlərinin faiz göstəriciləri isə yüksəkdir. Digər tərəfdən, risklər də gündəmdədir. Belə ki, bəzən vətəndaşlar qızıllarını geri ala bilmirlər və ya borcları sürətlə artır, şirkət müflis olur və sair.
Lombard krediti götürmək istəyənlər hansı təhlükə ilə üz-üzədir? Vətəndaşlar nələrə diqqət etməlidir?
İqtisadçı Əkrəm Həsənov deyib ki, 2017-ci ildən lombardlarla bağlı qanun layihəsi mövcuddur.
Onun sözlərinə görə, layihə lombardların fəaliyyətinin lisenziyalaşdırılması və tənzimlənməsini əhatə edir:
“Lakin hələ də qəbul olunmur. İndi də lombardların fəaliyyəti tam sərbəstdir. İstənilən şəxs şirkət aça bilər. Heç bir nəzarət və lisenziya lazım deyil. Yəqin ki, bunda maraqlı olan adamlar var. Əsas təhlükə vətəndaşın lombarda verdiyi girovla əlaqəlidir. Belə ki, lombardla müqavilə bağlanır, vətəndaş götürdüyü məbləğdən bir neçə dəfə bahalı qızıl-zinət əşyalarını girov qoyur. Borcu qaytara bilmədikdə lombard məhkəməsiz halda qızılları satışa çıxarır. Onlara güldən ağır söz deyən olmur. Qanunla lombard borclu şəxsi məhkəməyə verməli və qoyulan girovlar hərracda satılmalıdır”.
İqtisadçı bildirib ki, bəzən şəxs krediti qaytarsa da, lombard qızılı dəyişir:
“Nəzarət yoxdur. Yaxud adam qızılı verib kredit götürür, səhəri gün lombardın yoxa çıxdığını görür. Adətən lombard kreditlərini banka müraciət edə bilməyən və ya borclu şəxslər əldə etməyə çalışırlar. Ona görə də faizləri çoxdur. Amma banklar lombard krediti verəndə məhkəmədən kənar satışın, itkilərin və sair olmayacağını bilirsən. Tövsiyə edirəm ki, ümumiyyətlə lombarddan kredit götürməsinlər. Ehtiyac zamanı isə müqavilədə girov qoyduqları qızıl-zinət əşyasının meyarlarını, təsvirini mümkün qədər aydın yazsınlar, video və fotosunu çəksinlər. Sonra problem yaşanmaması üçün bu, önəmlidir”.
Globalinfo.az
