Fransanın Ermənistandakı səfiri Olivye Dekotini bildirib ki, Fransa Sünik bölgəsində tammiqyaslı konsulluq deyil, konsulluq ofisi açmağa qərar verib.
Onun sözlərinə görə, bu ofis fəxri konsul tərəfindən idarə olunacaq və Gorus şəhərində yerləşəcək.
Dekotini Gorusun seçilmə səbəbini belə əsaslandırıb: “Görus (Qoris) bir tərəfdən Sünikin kəsişmə nöqtəsidir, digər tərəfdən isə fransız dili ilə xüsusi bağlara malikdir. Əhalinin tərkibini nəzərə alsaq, bu, Ermənistanın ən çox fransızdilli şəhəri ola bilər”.
Musavat.com xəbər verir ki, Sünik bölgəsi – yəni Azərbaycanın tarixi Zəngəzur torpaqları – hazırda Ermənistanla İran arasında quru bağlantısını təmin edir və Zəngəzur dəhlizi məsələsində strateji əhəmiyyət daşıyır. Fransanın məhz bu bölgədə, xüsusilə də Gorusda konsulluq ofisi açması provokativ və siyasi xarakter daşıyır.
Azərbaycan baxımından bu təşəbbüs bir neçə məqamı ehtiva edir:
1. Fransanın Cənubi Qafqazda Ermənistan vasitəsilə yerləşmək istəyi – bu, xüsusilə Fransa-Ermənistan hərbi əməkdaşlığı fonunda narahatlıq doğurur.
2. Zəngəzur dəhlizi məsələsində qeyri-dost mövqe – Fransa bu bölgədə mövcudluq yaradaraq Azərbaycanın planlaşdırdığı regional nəqliyyat xəttinə dolayı təsir göstərmək istəyir.
3. Tərəfli mövqe – Fransanın diplomatik təşəbbüsləri Cənubi Qafqazda balanslı vasitəçilikdən çox, Ermənistana birtərəfli dəstək kontekstində dəyərləndirilir.
Bu baxımdan, Azərbaycanın bu diplomatik aktivliyə daha diqqətli və strateji yanaşması, regionda Türkiyə və digər tərəfdaşlarla koordinasiyanı gücləndirməsi zəruridir.
