Türkiyənin məşhur sənətçisi Volkan Konak Şimali Kiprdə konsert zamanı vəfat edib.
Volkan Konak 27 fevral 1967-ci ildə Trabzonun Maçka rayonunda anadan olub. Qara dəniz musiqisi ilə məşhurlaşan sənətçi güclü səsi, poetik mahnı sözləri və müasir aranjimanları ilə Türkiyənin ən sevilən sənətçilərindən birinə çevrilib
Maçkada orta məktəbi bitirdikdən sonra İstanbul Texniki Universitetinin Türk Musiqisi Dövlət Konservatoriyasından məzun olub.
1980-ci illərin sonlarında peşəkar musiqi karyerasına addım atan Konak, 1989-cu ildə ilk albomu “Suların Horon Yeri” ilə musiqi dünyasına daxil olub. Bu albom Qara dəniz musiqisinin ənənəvi quruluşunu müasir aranjimanlarla birləşdirən bir iş kimi diqqət çəkib. Lakin onun böyük çıxışı 1993-cü ildə yayımladığı “Efulim” albomu ilə baş verib. Bu albomdakı “Cerrahpaşa”, “Efulim” və “Mimoza Çiçeğim” kimi mahnılar sənətçinin geniş dinləyici kütləsinə çatmasını təmin edib.
Onun mahnılarında, çıxışlarında və bədii kimliyində Qara dənizin təsiri açıq şəkildə görünür. Ənənəvi Qara dəniz musiqisini müasir üslubla birləşdirərək geniş kütlələrə çatdırıb. Buna görə də Türkiyənin şimalında yerləşən Qara dəniz bölgəsinin bir təmsilçisi kimi “Kuzeyin Oğlu” (Şimalın Oğlu) ləqəbi ilə anılıb.
“Kuzeyin Oğlu” ləqəbi Volkan Konakın doğma torpaqlarına olan bağlılığını və incəsənətində Qara dəniz ruhunu yaşatmasını ifadə edir. Bu ad onun Qara dəniz musiqisinin ən önəmli nümayəndələrindən biri olduğunu vurğulayır
Bu ləqəblə televiziya proqramları da hazırlayıb. Xüsusilə, 2021-ci ildə Star TV-də yayımlanan “Kuzeyin Oğlu Volkan Konak” proqramı böyük maraq doğurub. Bu verilişdə musiqi, incəsənət və söhbətlərə yer verərək geniş bir tamaşaçı kütləsinə xitab edib.
Volkan Konak son sosial media paylaşımında həbs olunan İstanbul Böyükşəhər Bələdiyyə Başçısı Əkrəm İmamoğluna dəstəyini vurğulamışdı. Konak İmamoğluna qarşı aparılan əməliyyatla bağlı “Əkrəm başqana siyasətdə qaydalara zidd hərəkət edənlər utansın” demişdi.
O, İmamoğlunun həbsi ilə bağlı sosial media hesabında bu ifadələri işlətmişdi:
“Əziz dostum Əkrəm İmamoğlu futbol oynayanda belə həmişə qapıçı olurdu. Niyə? Komanda yoldaşlarına arxasını çevirməmək üçün. O, ömrü boyu centlmenliyindən və nəcibliyindən vaz keçmədi. Əkrəm başqana siyasətdə qaydalara zidd hərəkət edənlər utansın. O, mənim üçün hər zaman dəyərli bir dost olaraq qalacaq və həmişə yanında olacağam”.
V.Konakın səhnədə Türkiyənin qurucusu Mustafa Kamal Atatürk haqqında söylədiyi sözlər pərəstişkarları tərəfindən təkrar-təkrar paylaşılıb. Böyük maraqla qarşılanmışdı.
Volkan Konakın vəfatından sonra “Atatürkü sevməyən insanla dostluq edə bilmərəm” dediyi video minlərlə insan tərəfindən paylaşılıb.
Həmin videoda Konak belə deyib:
“Sənətimi bəyənməyən insanla dost ola bilərəm, amma vətənimi, məğlubedilməz cəngavərimiz Atatürkü sevməyənlə dostluq etmərəm”.
Globalinfo.az
