ABŞ Prezidenti Donald Trampın bütün ölkələrdən idxal olunan məhsullara yeni tariflər tətbiq etməsindən sonra neftin qiyməti düşüb. ABŞ dünyanın müxtəlif ölkələri üçün 10-dan 50 faizə qədər tariflər tətbiq etmək qərarına gəlib.
Bunun neftə tələbi azalda biləcəyi ilə bağlı qorxular artırıb. Üstəlik, OPEC+ ölkələrinin neft hasilatını artırmaq qərarının da bazara mənfi təsir göstərdiyi bildirilir.
Aprelin 4-də Londonun ICE birjasının ticarət məlumatlarına əsasən, "Brent" markalı neftin qiyməti 7.4 faiz düşərək bir barel üçün 64.74 dollar olub. Sonuncu dəfə "qara qızıl" 65 dollardan aşağı 2021-ci ilin avqustunda satılmışdı.
Dünya bazarında "Azeri Light" markalı Azərbaycan neftinin 1 barelinin qiyməti 3,84 ABŞ dolları, yaxud 5,22 % azalaraq 69,64 ABŞ dolları təşkil edib.
Hərracların nəticələrinə görə, “Brent” markalı neftin iyun fyuçerslərinin qiyməti 67,9 ABŞ dolları təşkil edib. Türkiyənin Ceyhan limanında FOB bazasında Azeri Light markalı Azərbaycan neftinin bir barelinin qiyməti 3,79 ABŞ dolları və ya 5,28 % azalaraq 68,02 ABŞ dolları təşkil edib.
Azərbaycanın 2025-ci il dövlət büdcəsində neftin bir bareli 70 dollara götürülüb.
İqtisadçı Natiq Cəfərli sosial şəbəkə hesabında neftin ucuzlaşmasının Azərbaycana təsirlərini şərh edərkən yazıb: "Yarım ildə neftin qiyməti 70 dollardan aşağı düşsə və ilin sonuna kimi 70-dən aşağı qalsa, o zaman Azərbaycanda ümumi makroiqtisadi göstəricilərə çox ciddi mənfi təsirləri ola bilər".
Onun sözlərinə görə, hələlik, ilin əvvəlindən götürülsə, Azərbaycan nefti ortalama 75 dollardan da yüksək qiymətə satılıb. Çünki yanvar, fevral, mart aylarında neftin qiymətləri daha yüksək olub: "Yəni, bunun günlük yox, rüblük, yarım illik və illik hesablanması daha doğru olar. Əgər tendensiya belə davam etsə və orta qiymət 70 dollardan aşağı düşsə, icmal büdcənin yerinə yetirilməsində müəyyən problemlər yaşana bilər. İndi, hələlik, təhlükəli hədd deyil".
Azərbaycanda ixracın 92 faizə yaxını neft və qazın payına düşür.
