İranın xarici işlər naziri Abbas Əraqçi ABŞ ilə birbaşa danışıqlar aparmağın mənasız olduğunu bildirib.
1xeber.media xəbər verir ki, bu barədə "Agence France-Presse" agentliyi məlumat yayıb.
Əraqçi açıqlamasında deyib: "Davamlı olaraq güc tətbiq etməklə hədələyən və müxtəlif rəsmiləri vasitəsilə ziddiyyətli mövqelər ifadə edən tərəflə birbaşa danışıqların heç bir mənası yoxdur".
Qeyd edək ki, martın 7-də ABŞ prezidenti Donald Tramp İranın ali dini lideri ayətullah Əli Xameneiyə məktub göndərərək nüvə proqramı üzrə danışıqlar aparmağı təklif etmişdi. Tehran Vaşinqtonla birbaşa dialoqdan imtina etsə də, vasitəçilər vasitəsilə danışıqlar aparılmasına razı olmuşdu.
Martın 30-da isə Tramp nüvə proqramı üzrə danışıqlar nəticə verməsə, iki həftə ərzində İrana qarşı əlavə gömrük rüsumları tətbiq edəcəyini bildirib. O, həmçinin İranın razılaşmadan tam imtina edəcəyi halda, ölkəni görünməmiş bombardmanlarla hədələyib.
Cavab olaraq ayətullah Xamenei ABŞ-nin hərbi müdaxiləyə gedəcəyinə inanmadığını, lakin Vaşinqtonun İranda hər hansı iğtişaş yaratmaq cəhdinə qətiyyətlə cavab veriləcəyini vurğulayıb.
