Naxçıvan Muxtar Respublikasında baş verənlər vaxtaşırı medianın da gündəminə gəlir. 2022-ci ilin noyabrından sonra muxtar respublikada baş verənlər diqqətlə izlənir. Buna baxmayaraq orda hələ də vəziyyət düzəlmir. Yenə də neqativ halların davam etdiyi deyilir. Bəzi iddialara görə, 30 ilə yaxın Talıbov rejiminin yaratdığı problemləri 2-3 ilə qaydaya salmaq mümkün deyil.
Naxçıvan Muxtar Respublikası Səhiyyə Nazirliyində DTX-nın son yoxlamaları, əməliyyatları buna sübutdur. Bu yoxlamalar əsnasında muxtar respublikanın səhiyyə naziri Samiq Sadıqovun işdən çıxarılacağı haqda məlumat yayılıb. Naxçıvanda vəziyyət niyə düzəlmir?
1xeber.media xəbər verir ki,Globalinfo.az-a danışan siyasi şərhçi Heydər Oğuz bildirib ki, Naxçıvanda baş verən neqativ hadisələrdə keçmişdəkilər qədər indiki administrasiyanın da ciddi səhlənkarlığı var:
“Faktiki olaraq indiki yerli rəhbərlik Vasif Talıbovun vaxtında yaşanan neqativ halların qarşısını almaq, muxtar respublikaya dəyən ziyanı kompensasiya etmək üçün vəzifəyə gətirilib. Amma biz Naxçıvan rəhbərliyinin fəaliyyətində tamamilə fərqli situasiya ilə qarşılaşırıq. Vasif Talıbovun dövründən qalan problemlər nəinki azalıb, əksinə, daha da dərinləşib. İş o yerə çatıb ki, Naxçıvan camaatı artıq Vasif Talıbovun ölənlərinə rəhmət oxuyur”.
Naxçıvanın səhiyyə sisteminə gəlincə, Heydər Oğuzun fikrincə, bu sektorda həqiqətən ağlasığmaz hadisələr baş alıb gedir:
“Bakıdan gətirilən həkimlərlə yerli həkimlərin maaşları arasında astronomik fərqlər, xəstələrə düzgün xidmət göstərilməməsi, pul silmək məqsədilə həkim yoxlamalarından keçməmiş uşaqlara D vitamini verilməsi, Doğum Mərkəzində lazım gəldi-gəlmədi qeysəriyyə əməliyyatlarının aparılması və əməliyyat sırasında səriştəsiz həkimlərin ana bətnindəki uşağı yaralaması və s. kimi hallar adi normaya çevrilib. Bununla belə, bu işdə sadəcə, Naxçıvan səhiyyə nazirini günahlandırmaq da ədalətsizlikdir. Bilirsiniz ki, təkcə Naxçıvanda deyil, Azərbaycanın bütün rayonlarında bir çox xəstəxanalar TƏBİB-in ixtiyarına verilib. Naxçıvanda bu qurumu TMİB adlı təşkilat əvəz edir. Səhiyyə Nazirliyinin nəzarətində yalnız bəzi tədqiqat mərkəzləri qalıb. Qısası, TMİB-in yol verdiyi əksər nöqsanlar Səhiyyə Nazirliyinin adına yazılır. Hesab edirəm ki, bu cür neqativ halların qarşısını almaq üçün səhiyyə sistemində qarışıqlıq yaradan ikitirəlik ortadan qaldırılmalı, hər şey vahid mərkəzdən idarə olunmalıdır. Bu həm də nazirlik yetkililəri qarşısında məsuliyyət hissini artırar və heç kim vəziyyətdən sui-istifadə etməz. Məncə, səhiyyə sistemində yaşanan bir çox xoşagəlməz hadisələr məsuliyyət bölgüsünün düzgün aparılmamasından və idarəçilərin öz vəzifə borclarını doğru anlamamasından qaynaqlanır”.
