"Şərur-İnşaat" Mənzil-Tikinti Korporativinin rəhbəri, tanınmış iş adamı İsfəndiyar Axundov (Şərurlu İsfəndiyar) sahibi olduğu bahalı “Hollivud” restoranında şair, yazıçı və siyasətçilərin iştirakı ilə toplantı keçirib.
1xeber.media Teleqraf-a istinadla xəbər verir ki, restoranda yazıçı Məmməd Orucun “Köçürülmə” romanının yeni nəşri, professor Əfzələddin Əsgərin “Böyük türkmanlar və türk dastan yaradıcılığı tarixinin oğuznamə dövrü” elmi əsəri və şair Vaqif Bəhmənlinin “İri planda” (Qulu Məhərrəmlinin həyat və yaradıcılıq portreti) kitablarının təqdimatı keçirilib.
“Vətəndaş Tribunası” İctimai Birliyi və Şərur-İnşaat MTK-nın birgə layihəsi olan tədbirdə qonaqları İsfəndiyar Axundov özü qarşılayıb.
Təqdimata şair, yazıçı və alimlər – Səfər Alışarlı, Məmməd Oruc, Vaqif Bəhmənli, professor Qulu Məhərrəmli, Əfzələddin Əsgər, akademik Muxtar İmanov, Tahir Taisoğlu, Arzu Nehrəmli, Adil Cəmil, Məti Osmanoğlu, siyasətçilər Qafar Əliyev, Nemət Pənahlı və başqaları qatılıb.
Təqdimatı giriş sözü ilə açan “Vətəndaş Tribunası” İctimai Birliyinin sədri, yazıçı Səfər Alışarlı tədbiri QHT-biznes əməkdaşlığının faydalı və yaxşı nümunəsi adlandırıb. O, təqdim edilən kitabların bədii-estetik və elmi-publisistik dəyəri haqqında danışaraq deyib ki, kitabların hər biri öz janrında Azərbaycan ədəbiyyatı, elmi və mətbuat araşdırmaları üçün mühüm əhəmiyyət daşıyır. 1948-51-ci illərdə 100 min azərbaycanlının Ermənistandakı dədə-baba yurdlarından deportasiya edilməsini böyük istedad enerjisi ilə təsvir edən Məmməd Orucun “Köçürülmə” əsəri 30 il əvvəl yazılsa da, öz aktuallığını və bədii dəyərini bu gün də itirmir. Əsərdə bütöv bir elin faciəsi rus imperiyasının müstəmləkə zülmünün bariz təzahürü kimi öz əksini tapır.
Əfzələddin Əsgərin folklor tədqiqatlarını həm elmi, həm də bədii yaradıcılıq üçün mühüm əhəmiyyət kəsb etdiyini deyən S.Alışarlı professor Əfzələddin Əsgərin “Böyük türkmanlar və türk dastan yaradıcılığı tarixinin oğuznamə dövrü” kitabını müasir folklorşünaslığa ciddi töhfə adlandırıb.
Vaqif Bəhmənlinin “İri planda” kitabının Qulu Məhərrəmlinin həyat və yaradıcılığına həsr edildiyini deyən S.Alışarlı onu Azərbaycan mətbuatının realist güzgüsü kimi səciyyələndirib. Kitabda Qulu Məhərrəmlinin 43 illik telejurnalistika fəaliyyəti yüksək qiymətləndirilərək, ona ölkənin az qala yarım əsrlik ictimai-siyasi həyatında baş verən hadisələrin prizmasından baxıldığı qeyd edilib.
Şərur-İnşaat MTK-nın rəhbəri İsfəndiyar Axundov tədbirdə iştirak edən yazıçı, şair, alim və jurnalistləri salamlayaraq belə əməkdaşlığı və həmrəyliyi yüksək qiymətləndirdiyini, Azərbaycan ziyalılarını, ölkədə təhsili, maarifi, eləcə də köməksiz insanları həmişə dəstəklədiyini bildirib.
Tədbirdə çıxış edən YAP Qaradağ rayon şöbəsinin sədri Qafar Əliyev müasir Azərbaycanda bütün uğurların rəhni olan Heydər Əliyev siyasətinin uğurla davam etdirildiyini bildirib, ölkədə yaradıcı insanlara, elmə və jurnalistikaya dövlət qayğısının daim artırıldığını vurğulayıb.
Qeyd edək ki, İsfəndiyar Axundovun adı son zamanlar bir çox qalmaqallarda hallanıb. O, müsahibələrinin birində yazıb-oxumaq bacarmadığını, amma alimlərin ona işlədiyi söyləmişdi. İş adamı həm də "imkanım olsa, bütün məscidləri söküb yerində məktəb tikərəm" fikiri ilə gündəmə gəlmişdi.
