ABŞ prezidenti Donald Tramp hesab edir ki, Ukrayna prezidenti Vladimir Zelenski Rusiya ilə Krımın verilməsini nəzərdə tutan sülh sazişi bağlamağa hazırdır.
xeber.media “Sky News”-a istinadla xəbər verir ki, Tramp Vatikanda keçirilən görüşdə tərəflərin işğal olunmuş yarımada ilə bağlı məsələni müzakirə etməyə nail olduğunu bildirib.
O, jurnalistlərə Zelenskinin Rusiyanın 2014-cü ildə ələ keçirdiyi əraziləri güzəştə getməyə hazır olub-olmadığını soruşduqda, “Mən belə düşünürəm” deyib.
"Yaxın bir neçə gündə nə olacağını görəcəyik... Mənimlə Krım haqqında danışmayın, Obama və Baydenlə Krım haqqında danışın", - o əlavə edib.
Krım 2014-cü ildə Barak Obama ABŞ prezidenti olanda Rusiya tərəfindən ilhaq edilib.
Tramp həmçinin bildirib ki, Papa Fransiskin dəfn mərasimində Zelenski ilə görüşü yaxşı keçib: “Görürəm ki, o, sakitləşib. Məncə, o başa düşür və sövdələşmə etmək istəyir”.
Eyni zamanda, “The Telegraph” nəşri yazıb ki, Britaniya hökumətindəki mənbələr müharibənin dayandırılması üçün danışıqların gedişinə nikbin olduqlarını bildiriblər.
“Uzun müddətdən sonra ilk dəfədir ki, bütün tərəflər kifayət qədər pozitivdir, hamının eyni istiqamətdə getdiyini düşünür və hamı yaxın bir neçə günün həlledici olmasını istəyir”, - mənbə bildirib.
Ukrayna və Rusiyadan olan danışıqlarçıların yaxın gələcəkdə cəbhə xətlərinin dondurulması və Ukraynanın Krımdan imtina etməsini ehtiva edən planın təfərrüatını birbaşa müzakirə edəcəyi gözlənilir.
