Bakıda əhali sayının çox olması İran Prezidenti Məsud Pezeşkianı təəccübləndirib. Belə ki, o, bununla bağlı Bakı Şəhər İcra Hakimiyyətinin (BŞİH) başçısı Eldar Əzizova sual verib. Aldığı cavab isə İran prezidentinin heyrətinə səbəb olub. O, ölkə əhalisinin yarısının paytaxtda yaşadığını vurğulayıb. Sözügedən dialoq yenidən bir sıra məsələləri gündəmə gətirib.
Bildirilir ki, Bakıda bu qədər insanın məskunlaşması nələrinsə düz getmədiyindən xəbər verir. Hətta dəfələrlə regionların sosial-iqtisadi inkişafı proqramı elan edilsə də, hər hansı inkişaf gözə çarpmır. Əksəriyyət ilk fürsətdə Bakıya köçməyə can atır.
Bunun səbəbləri nələrdir?
1xeber.media xəbər verir ki,Globalinfo.az-a danışan iqtisadçı-professor Elşad Məmmədov deyib ki, ölkədə regionların sosial-iqtisadi inkişafı istiqamətləri üzrə ardıcıl proqramlar qəbul olunub:
“Bir sıra işlər görülsə də, paytaxtda işgüzar fəallığın artdığını müşahidə edirik. Regionların sosial-iqtisadi inkişafı ilə bağlı müvafiq tədbirlərin genişləndirilməsinə ehtiyac var. Bununla əlaqədar dövlət başçısı tərəfindən müvafiq tapşırıqlar verilib. Fikrimcə, aidiyyəti qurumlar buna uyğun şəkildə intensiv fəaliyyət göstərməlidir. Sosial, mədəni, bank sektoru ilə bağlı infrastrukturun təminatına, eyni zamanda iqtisadiyyatın strateji planlaşdırmaya əsasən idarə olunmasına üstünlük verməliyik. Bura məhsuldar qüvvələrin iqtisadiyyatda müəyyən edilmiş əsas magistral hədəflərə uyğun şəkildə yerləşdirilməsi məsələləri daxil olmalıdır. İqtisadiyyatda gözlənilən dayanıqlı, uzunmüddətli hədəflər formalaşdırılaraq ictimaiyyətə təqdim edilməlidir. Paralel olaraq, sosial, mədəni, humanitar sferaya aid olan istiqamətlərə çıxış imkanları təmin edilməlidir. Bu məsələlərin həlli regionların sosial-iqtisadi tarazlığında müvafiq şərait formalaşdırmalıdır”
İqtisadçı Əkrəm Həsənov bildirib ki, Azərbaycanda regionlar inkişafdan geri qalır:
“Regionların sosial-iqtisadi inkişafı proqramı korrupsiya, yeyintilər olduğu üçün təyinatı üzrə istifadə edilmədi. Həmçinin inkişaf üçün gərək regionlararası münasibət də olsun. Bunların heç biri yoxdur, amma bu barədə kimsə danışmır. Məsələn, Qubadan Şəkiyə, Gəncəyə gedə bilmirik. Halbuki, xəritədə görünür ki, Şəki və Gəncədən Qubaya daha yaxındır, nəinki, Bakıdan… Yol insfrastrukturu normal deyil. Vəziyyət çox pisdir”.
