İngiltərə Fransa ilə Fələstinin tanınması məsələsini müzakirə edir. Ehtimal edilir ki, bu addım 2025-ci ilin yayında atılacaq.
1xeber.media xəbər verir ki, bu barədə "The Guardian" yazıb.
Böyük Britaniya parlament komitəsi qarşısında çıxış edən Britaniyanın xarici işlər naziri Devid Lammi ilk dəfə olaraq London və Parisin Səudiyyə Ərəbistanının birgə sponsorluğu ilə keçiriləcək konfransla əlaqədar Fələstinin tanınması məsələsini müzakirə etdiyini təsdiqləyib. Eyni zamanda o, daha əvvəl vurğulamışdı ki, Fələstin dövlətçiliyinin tanınması üçün zəruri şərt Qəzza zolağında HƏMAS hərəkatının nümayəndələrinin hakimiyyətdən tamamilə uzaqlaşdırılması olacaq.
Qeyd olunub ki, Fələstinin BMT Təhlükəsizlik Şurasının iki daimi üzvü tərəfindən tanınması Fələstin-İsrail nizamlanması istiqamətində səylərə yeni təkan verə bilər, lakin bu yolunda çoxsaylı diplomatik maneələr var. Əsas olanlardan biri İsrailin müqaviməti olacaq, onun rəhbərliyi Fələstinin tanınmasının HƏMAS və İranın mövqelərini gücləndirəcəyinə inanır.
Xatırladaq ki, aprelin 9-da Fransa prezidenti Emmanuel Makron bəyan etmişdi ki, Paris iyunda Fələstin dövlətçiliyini tanıya bilər.
