İki ay əvvəl Prezident İlham Əliyevin 9 May Qələbə Günü münasibətilə Moskvada keçiriləcək paradda iştirak etməyəcəyini ehtimal etmişdim.
Dünən isə bu ehtimal rəsmi təsdiqini tapdı. Azərbaycanın bu qərarı heç də sürpriz deyil — Bakı-Moskva münasibətlərində dərin strateji çatlar var və onların qaynağı məhz Kremldir.
Məsələ ilə bağlı fikirlərini bölüşən siyasi şərhçi Məhəmməd Əsədullazadə bildirib ki, Rusiya artıq bölgədə əvvəlki kimi güclü və nəzarətçi dövlət deyil
“Rusiya hələ də Azərbaycanın mülki təyyarəsinin vurulması ilə bağlı nə qənaətbəxş istintaq aparıb, nə də rəsmi şəkildə üzr istəyib. Bu isə Azərbaycan cəmiyyətində və siyasi dairələrdə haqlı narazılıq doğurur.
Üç günə Kiyevi tutacağını deyən Rusiyanın bu gün öz səması Ukrayna PUA-larının nəzarətindədir. Bu da göstərir ki, Rusiyanın təmtəraqla keçirmək istədiyi 9 May paradı belə ciddi təhdid altındadır”.
Əsədullazadəyə görə, Putin yalnız Ukrayna ilə sülh danışıqlarına başlayacağı təqdirdə Rusiyanı siyasi izolyasiyadan çıxara bilər:
“Əgər V. Putin Ukraynanın dövlətçiliyinin məhvini hədəfləməkdən vaz keçərsə və real, praktik addımlarla sülh yoluna yönəlsə, bu, həm region üçün, həm də Rusiya üçün çıxış yolu ola bilər”.
Tribunainfo.az
