Azərbaycan Prezidenti İlham Əliyevin bu il Moskvada keçiriləcək 9 May – Qələbə Günü paradında iştirak etməyəcəyi xəbəri böyük rezonans doğurub. İddia edilir ki, Prezidentin bu qərarı son vaxtlar Rusiyanın Azərbaycana qarşı arzuolunmaz addımlar atması ilə əlaqəlidir.
1xeber.media xəbər verir ki,Globalinfo.az-a danışan politoloq Oqtay Qasımov bildirib ki, Prezidentin Moskvaya getməməsi tamamilə doğru və yerində verilmiş qərardır:
“Çünki Rusiya son yarım ildə Azərbaycana qarşı açıq şəkildə etinasızlıq və hörmətsizlik nümayiş etdirib. Konkret olaraq bir neçə hadisə bu səfərin baş tutmamasını zəruri edib. Məsələn, AZAL-a məxsus sərnişin təyyarəsinin Rusiyada qəzaya uğramasından 5 ay keçməsinə baxmayaraq, Moskva hələ də hadisə ilə bağlı ətraflı və əməli istintaq aparmayıb. Azərbaycan isə qəzanın səbəblərinin aydınlaşdırılmasını və məsul şəxslərin müəyyən edilərək cəzalandırılmasını tələb edir.
Bundan əlavə, Azərbaycanın bir sıra media resurslarına qarşı keçirilən kiberhücumların mənbəyinin də Rusiya olduğu artıq sübuta yetirilib. Bu, son dərəcə ciddi məsələdir və Moskva-Bakı münasibətlərinə real təsir göstərən səbəblərdən biridir”.
Politoloq qeyd edib ki, son olaraq Azərbaycan Milli Məclisinin deputatı Azər Badamovun Rusiyada saxlanılaraq deport edilməsi Prezidentin qərarına təsir edən mühüm amillərdəndir:
“Bütün bu faktorlar Rusiya ilə münasibətlərdə soyuqluğu göstərir. Artıq tərəflərin bir-birinə baxışı arasında ciddi fərqlər var. Azərbaycan Rusiya ilə bərabərhüquqlu əməkdaşlıq formatında münasibətlər qurmağa çalışır, Rusiya isə hələ də imperialist düşüncədən çıxmaq istəmir və müstəmləkəçi yanaşma sərgiləyir.
Bu yanaşma rəsmi Bakı üçün qəbuledilməzdir. Ona görə də Prezident İlham Əliyevin Moskvaya səfər etməməsi tamamilə doğru qərardır. Ümumiyyətlə, Bakının Kremlin siyasətinə qarşı mövqeyi hər zaman adekvat olacaq”.
