Azərbaycan Prezidenti İlham Əliyevin 9-10 may tarixlərində Qarabağa, xüsusilə də Şuşaya səfəri diqqət çəkdi. Son illərdə Prezidentin məhz bu tarixlərdə Şuşada olması artıq bir ənənəyə çevrilib.
Lakin builki səfər fərqli kontekstdə baş tutdu. Dövlət başçısı Moskvada 9 May – Faşizm üzərində Qələbə Günü münasibətilə keçirilən ənənəvi parada qatılmaqdan imtina edərək edərək Şuşaya getdi.
Ekspertlərin fikrincə, Azərbaycan Prezidentinin bu addımı həm Rusiya, həm də regiona ünvanlanan açıq siyasi mesajdır.
1xeber.media xəbər verir ki,Globalinfo.az-a danışan politoloq Qabil Hüseynli deyib ki, Prezident İlham Əliyevin sözügedən tarixlərdə Qarabağa, əsasən Şuşaya səfər etməsi artıq bir ənənə halını alıb:
“Bu bir ənənə olmaqla yanaşı, eyni zamanda Azərbaycanın geosiyasi prioritetlərinin artıq dəyişməkdə olduğunun real göstəricisidir. Məsələ ondadır ki, əvvəllər Moskva ilə münasibətləri balanslı şəkildə yürütmək üçün qələbə paradında yüksək səviyyədə iştirak edilirdi. Bu, bir növ diplomatik jest idi. Prezident indi Qarabağda, konkret olaraq Şuşada bu günü qeyd edərək, “Biz artıq tariximizi öz torpağımızda yazırıq”, – mesajını verir.
Hesab edirəm ki, qələbənin yeni ünvanı artıq Şuşadır. Rusiya isə Azərbaycan üçün prioritetli tərəfdaş olsa da, həlledici güc deyil. Bu, Moskvanın Cənubi Qafqaz siyasətindəki təsir imkanlarının məhdudlaşmasının bariz təzahürüdür”.
Politoloqun sözlərinə görə, İlham Əliyev bir daha Azərbaycanın artıq postsovet məkanında “itaətkar oyunçu” olmadığını sübut etdi:
“Rusiya istədiyi zaman status-kvonu dəyişdirə bilməz. Üstəlik, Moskvadakı paradın bir simvol kimi mahiyyəti də Azərbaycan üçün artıq keçmişdə qalıb. Əvəzində Şuşadakı Zəfər yolu, azad edilmiş torpaqlarda tikilən məktəblər, hava limanları Azərbaycanın yeni geosiyasi kimliyinin və suveren yanaşmasının təzahürüdür.
Azərbaycan Prezidentinin Şuşadakı varlığı sadəcə ziyarət deyil, strateji mövqedir. Bu, beynəlxalq güclərə verilən mesajdır ki, Bakı artıq geopolitik cəbhədə öz ssenarisi ilə hərəkət edir və bu ssenaridə Rusiya daha əvvəlki qədər mərkəzdə deyil”.
