ABŞ Prezidenti Donald Tramp və Rusiya Prezidenti Vladimir Putin arasında bir müddət öncə yeni telefon danışığı baş tutdu. Tramp sözügedən danışıqla bağlı bildirib ki, əsas müzakirə mövzularından biri İranın nüvə proqramı olub. Liderlər arasında Ukrayna məsələsi də əsas gündəm mövzularından biri kimi yer alıb.
Əslində İran məsələsinin Tramp-Putin danışığında önəmli yer tutması xüsusi diqqətə layiqdir. Sual yaranır: Bu mövzu niyə Rusiya ilə ABŞ liderlərinin dialoqunda prioritet məsələdir?
Globalinfoaz-a danışan politoloq Əlimusa İbrahimov bildirib ki, Tramp və Putin arasında baş tutan sonuncu telefon danışığı hazırkı məqam üçün olduqca əhəmiyyətlidir:
“Gözlənilən idi ki, danışıqların əsas mövzusu Rusiya–Ukrayna müharibəsi və sülh gündəliyi olacaq. Müharibə davam edir və son günlərdə müəyyən aktivlik də müşahidə olunur. Tramp isə bu münaqişəni dayandırmaq istəyir.
Artıq bir neçə raunddur ki, tərəflər arasında danışıqlar gedir. Lakin İstanbulda keçirilən sonuncu görüş, təəssüf ki, nəticəsiz qaldı. Tramp həmin görüşdə tərəfləri atəşkəsə razı sala bilmədi. Məhz buna görə də o, Putinlə birbaşa danışmaq istəyirdi. Telefon danışığında da əsas müzakirə sülh məsələsi ilə bağlı idi.
Tramp yaxşı anlayır ki, əgər müharibənin qarşısını ala bilməsə, bu, onun seçki öncəsi verdiyi vədləri yerinə yetirə bilməməsi ilə nəticələnəcək. Bu isə həm daxili siyasi rəqibləri tərəfindən tənqid üçün fürsətə çevrilə bilər, həm də ABŞ-ın qlobal mövqeyinə mənfi təsir göstərə bilər.
Əgər Tramp Rusiya–Ukrayna müharibəsinin qarşısını ala bilməsə, bu, digər bölgələrdə də gərginliyin artmasına və ümumi olaraq qlobal sülh səylərinə ciddi zərbə vura bilər. Son zamanlar Trampın bu münaqişəyə olan diqqətinin bir qədər azaldığı da hiss olunur. Trampın Putinlə telefon danışığında gündəmə gətirdiyi ikinci mühüm məsələ isə İranın nüvə proqramı olub. O, Putinlə danışıq zamanı Rusiyanın İrana dəstəyi dayandırmasını istəyib. Bu, həm də Ukrayna müharibəsindən diqqəti başqa bir istiqamətə çəkmək üçün istifadə edilən alternativ mövzudur” .
