İşğaldan azad olunmuş ərazilərdə həyata keçirilən tikinti-quruculuq işlərinin miqyası və dinamikası gündən-günə artır. Bu sahədə çoxsaylı layihələr hazırlanır və icra olunur. Aparılan inşaat işləri ilə bağlı zaman-zaman müxtəlif müsbət və mənfi məlumatlar yayılır.
İşğaldan azad edilən ərazilərdəki təmir və tikinti işlərinə vahid nəzarət mexanizmi varmı? Bu, hansı qaydada aparılır?
Globalinfo.az-a danışan deputat Aqil Abbas deyib ki, Qarabağda aparılan quruculuq işlərinə dövlət səviyyəsində birbaşa nəzarət var:
“Prezidentilin əksər günlərini Qarabağda səfərdə olur. O, tapşırıqların icrasına birbaşa nəzarət edir. Belə olan halda, aparılan tikinti işlərində özbaşınalıq ola bilərmi?! Ölkə başçısı həmin ərazilərdə hər hansı bir tikilinin təməlini qoyur və proses başa çatdıqdan sonra şəxsən ora baxış keçirir, nöqsanların olub-olmamasını özü yoxlayır.”
Millət vəkili bildirib ki, işğaldan azad edilən ərazilərdə aparılan tikinti işləri ilə bağlı mənfi rəy formalaşdıranlar Qarabağın azadlığını istəməyənlərdir:
“Hazırda Xankəndidən Ağdama doğru yolda irəliləyirəm. Böyük quruculuq və tikinti işləri aparılır, yeni asfalt yollar çəkilir, Xocalıda isə möhtəşəm körpü inşa olunur. İş olan yerdə, əlbəttə, nöqsan da ola bilər. Bu isə dərhal aradan qaldırılır. Guya kiminsə öz inşa etdirdiyi evdə heç bir qüsur olmur? İşğaldan azad edilən ərazilərdə əsas quruculuq işləri antiterror əməliyyatından sonra başlayıb. Qısa müddət ərzində böyük işlər görülüb, bərpa nəticəsində sakinlər öz doğma yurdlarına qayıdıblar. Tikinti prosesi sürətlə aparılır, bərpanı başa çatdırmaq üçün bəzən tələskənlik olur. Bunun nəticəsində hansısa texniki qüsurların yaranması mümkündür. Ümumilikdə, Qarabağda yaradılan bugünkü şəraitə sevinmək lazımdır”.
