Azərbaycanda ərik bağlarında ən aşağı məhsuldarlığın qeydə alındığı Samux rayonu ardıcıl olaraq 2-ci dəfədir “Ərik Festivalı”na ev sahibliyi edir.
1xeber.media açıqlanan sonuncu rəsmi məlumatlara istinadən xəbər verir ki, Azərbaycanda ən çox ərik bağları Goranboy rayonu ərazisində yerləşir.
Ən çox məhsul yığımı da ötən il Goranboy rayonunda qeydə alınıb. Ən məhsuldar ərik bağları isə Xocavənd və Tovuz rayonlarında olub.
Məlumat üçün bildirək ki, Goranboy rayonunda 394,1 hektar ərik bağları olub və bu bağlardan il ərzində 3 577,8 ton ərik yığılıb. Goranboyda məhsuldarlıq hər hektara 91,8 sentner olub. Ən yüksək məhsuldarlığın qeydə alındığı Xocavənd rayonunda hər herktardan 231,9 sentner, Tovuz rayonunda isə hər hektardan 218,2 sentner ərik yığılıb.
Maraqlıdır ki, iki ildir “Ərik Festivalı”na ev sahibliyi edən Samux rayonunda hər hektardan cəmi 5,8 sentner ərik toplanıb. Samux rayonu bu göstərici üzrə Azərbaycanda sonuncu yerdə qərarlaşıb.
Qeyd edək ki, ötən il Samux rayonunda 370,8 hektar ərik bağının olduğu və buradan 119,9 ton ərik yığıldığı bildirilir. Yığılan əriyin miqdarına görə Samux rayonu Azərbaycanda ərik əkilən 68 şəhər və rayon arasında 37-ci sırada yer alıb.
Lakin, ötən il Samux rayon İcra Hakimiyyətinin “Ərik Festivalı” ilə bağlı açıqladığı məlumatda “Ərik Festivalı”nın Samux rayonunda keçirilməsinin təsadüfi olmadığı qeyd olunub. Bildirilib ki, Azərbaycanda Ordubad rayonundan sonra ən çox ərik yetişdirilən rayon Samuxdur.
Həmin vaxt Yeniavaz.com saytında “İcra Hakimiyyətindən əriklə bağlı yanlış məlumat – Ordubad 1-ci, Samux 2-cidir?” sərlövhəli yazı dərc olunmuşdu.
Bir neçə gün əvvəl Samux rayon İcra Hakimiyyətinin “II Ərik Festivalı” ilə bağlı açıqladığı məlumatda da “Ərik Festivalı”nın Samux rayonunda keçirilməsinin təsadüfi olmadığı qeyd olunub. Ötən il açıqlamada yer alan cümlə (“Azərbaycanda Ordubad rayonundan sonra ən çox ərik yetişdirilən rayon Samuxdur” – red.) dəyişdirilərək “Azərbaycanda ən çox ərik yetişdirilən rayonlardan biri də Samuxdur” cümləsi ilə əvəz edilib.
Onu da bildirək ki, İcra Hakimiyyətinin ötən il və bu il açıqladığı məlumatlarda cümlələrin böyük əksəriyyəti olduğu kimi qalıb. Məsələn, açıqlamadan belə görünür ki, Samux rayon İcra Hakimiyyətinin başçısı Firdovsi Əliyevin festivalda səsləndirdiyi fikirlərdə heç bir dəyişiklik olmayıb. Firdovsi Əliyev həm ötən il həm də bu il deyib ki, Samux rayonunda təkcə ərik bağlarının sahəsi 500 hektardan çoxdur. Ancaq qeyd etdiyimiz kimi, Dövlət Statistika Komitəsinin açıqladığı məlumatda açıq şəkildə göstərilib ki, ötən il Samux rayonunda 370,8 hektar ərik bağları olub.
Cədvəldə Azərbaycanın şəhər və rayonlarında ərik bağlarının sahəsi, il ərzində yığılan məhsulun miqdarı və hər hektara düşən məhsuldarlıq göstərilib:
