Bakı-Moskva münasibətlərində daha bir təlatümlü dövr hələ ki, arxada qalmayıb. Müəyyən pozitiv simptomlar olsa da, belə görünür, əvvəlki “status-kvo” durumuna qayıdışa çox var. Baş səbəb bəlli: tibbi dillə desək, bir xəstəliyin kardinal müalicəsi üçün öncə onun düzgün diaqnozu qoyulmalıdır. Yəni etiologiyası, mənbəyi müəyyən edilməlidir.
O da ki, ötən ilin dekabrına – AZAL təyyarəsinin Qroznı səmasında vurulduğu tarixə gedib çıxır. O vaxt Rusiya tərəfi uzaqgörənlik eləsəydi, Azərbaycanla tərəfdaşlığın dəyərini düzgün hesablasaydı, nəhayət, 22 fevral (2022) Moskva Bəyannaməsinə “ruhuna” sayğılı olsaydı, xülasə, qəza ilə bağlı gərəkənləri etsəydi, indi vəziyyət bu həddə çatmazdı. Bəlkə heç Yekaterinburq olayları da baş verməz, yaxud yaşansaydı belə, Azərbaycan cəmiyyətində bunca qıcıq yaratmazdı...
Şübhəsiz, Rusiyada da iki qonşu arasında münasibətlərin 7 ay əvvəlki kimi dost xarakterli qalmasında səmimi şəkildə maraqlı olanlar, ədalət hissini itirməyənlər, mövcud durumdan üzülənlər var. Onlardan biri də Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsinin sədri, Azərbaycana münasibətdə obyektivliyi ilə tanınan Leonid Kalaşnikovdur.
“Son həftələrdə baş verənlər Rusiya-Azərbaycan münasibətlərinin yaxşı olmasını istəyənlər, özlərini bu mövzuya həsr edənlər, dövlətlərimizin sabit inkişafı və qüdrətini müdafiə edənlər arasında ciddi narahatlıq yaratmaya bilməz”.
Kalaşnikov bunu “Moskva-Bakı”ya müsahibəsində deyib (Axar.az).
Komitə sədrinə görə, hər zaman olduğu kimi, yaranmış vəziyyətdən qazanc əldə etməyə, hansısa siyasi xal qazanmağa çalışanlar var ki, günahı gah birinə, gah da digərinin üzərinə yıxmağa çalışırlar: “Belə oyunların əleyhinəyəm. Çünki bilirəm ki, Rusiya ilə Azərbaycanın, Putinlə Əliyevin əslində necə münasibətləri var. Bu vəziyyətdə ürəyim qan ağlayır. Axı bizim ölkələrimiz bir-birinə çox mehribandır. Liderlərimiz arasında çox səmimi münasibətlər var. Son illər münasibətlərimizdə müsbət irəliləyişlər sevindirməyə bilməzdi”.
O səbəbə deputat haqlı olaraq hesab edir ki, münasibətlərimizdə olanları dəyərləndirməliyik. “Ola bilsin, bu sözlər bəzilərinə bəsit görünər, amma məncə, yalnız iki nəfər sakit, düşünülmüş və istənilən problemi bacarıqla həll etməyə qadirdir. Onlar ən çətin anlarda belə vaxt tapıb telefonu götürüb, bir-birinə zəng edib bütün məsələləri həll ediblər. Heç bir qüvvə dostluğumuza təsir edə bilməz. İstər Rusiyada, istərsə də Azərbaycanda heç bir millətçilik istəkləri bizim yaxşı münasibətlərimizi, insani bağlarımızı kəsə bilməyəcək. Mən buna tam əminəm”, - siyasətçi əlavə edib...
Qulağa xoş gələn sözlərdir. Hərçənd indi sözdən çox əmələ ehtiyac var. Məsələn, Kalaşnikov “yaranmış vəziyyətdən qazanc əldə etməyə, hansısa siyasi xal qazanmağa çalışanların” olduğunu deyir. Ancaq onlardan biri elə Dumada onun böyründə oturub. Komitə sədrinin 1-ci müavini, Azərbaycan düşməni Konstantin Zatilini deyirik.
Ocağı sönməyə qoymayan, daim ora yağ tökən bu ermənipərəst yaramaz və rus şovinisti neçə həftədir yenə gözünü yumub ağzını açıb. Əleyhimizə şər-böhtan, hədə yağdırır. Görəsən cənab Kalaşnikov öz müavininə bununla bağlı hansısa irad bildiribmi? Ona siyasi anlamda bir şapalaq çəkibmi ki, özünü yığışdır?
O ki qaldı problemin çözümü üçün iki liderin dəstəyi götürüb bir-birinə telefon açmasına, bunu öncə hansı tərəfin etməli olduğu gərək ki, bəlli...
Musavat.com
