Milli Məclisin deputatları avqustun 30-dək yay tətilinə buraxılıb. Məlumata görə, parlament üzvlərinə bu müddət üçün 5-7 min manat arasında əlavə tətil ödənişi veriləcək. Sözügedən məbləğ ictimaiyyətdə birmənalı qarşılanmayıb və geniş tənqidlərə səbəb olub. Vətəndaşlar deputatlara ayrılan bu vəsaiti hazırkı iqtisadi vəziyyətdə, əhalinin alıcılıq qabiliyyətinin aşağı olduğu bir dövrdə ədalətsiz hesab edirlər.
Bəs deputatlara verilən tətil ödənişi qanunvericiliyə və beynəlxalq parlament təcrübəsinə uyğundurmu? İddia edilən rəqəmlər nə dərəcədə əsaslıdır?
1xeber.media xəbər verir ki,Globalinfo.az-a danışan iqtisadçı Kənan Quluzadə deyib ki, deputatların maaş və təminatları “Deputatın statusu haqqında” Qanunla tənzimlənir.
Onun sözlərinə görə, onların illik məzuniyyət hüququ var və bu dövrdə maaş saxlanılır:
“Lakin əlavə tətil ödənişlərinin məbləği və əsasları ictimaiyyətə dəqiq izah edilməlidir. Əks təqdirdə, bu cür ödənişlər cəmiyyətdə sosial ədalət hissini zədələyə və etimadsızlıq yarada bilər. Rəqəmlərin reallığına gəlincə, Azərbaycan deputatlarının aylıq maaşı təxminən 2500–3000 manat komitə sədrləri və rəhbər vəzifəli deputatlarda isə 3500–4000 manat civarındadır. Mediaya düşən 5000–7000 manatlıq tətil ödənişi rəqəmləri ya bir neçə maaşın cəmi, ya da əlavə mükafat və ya məzuniyyət pulu şəklində formalaşır”.
İqtisadçı qeyd edib ki, bu rəqəmlərin reallığı və əsaslandırılması ictimaiyyətə aydın izah edilməsə, onların ictimai narazılıq yaratması qaçılmaz olur:
“Şəffaflıq bu məsələdə cəmiyyət üçün ən vacib amildir. Beynəlxalq təcrübədə isə deputatlar əsasən yalnız maaş alır, əlavə məzuniyyət mükafatları nadir hallarda tətbiq olunur. Xüsusən iqtisadi böhran və sosial problemlər fonunda belə ödənişlər ictimai qıcıq doğurur və hökumətdən daha şəffaf və əsaslandırılmış yanaşma tələb edir. Nəticə etibarilə, hüquqi cəhətdən bu ödənişlər müəyyən əsaslara söykənə bilər, amma ictimai gözləntilər və sosial ədalət prinsipləri baxımından məsələnin daha açıq izahına ehtiyac var”.
