2025-2026-cı tədris ilindən etibarən paytaxtın Yasamal rayonu 351, eləcə də Naftalan rayonu 2 nömrəli məktəbəqədər təhsil müəssisələrinin fəaliyyətinə start veriləcək.
1xeber.media xəbər verir ki, bu barədə MÜTDA məlumat yayıb.
Bildirilib ki, cari ilin may-iyul aylarında Masallı rayonunun Ərkivan qəsəbə 2 nömrəli və Cəbrayıl şəhəri körpələr evi-uşaq bağçası istifadəyə verilib: “Qeyd edilən təhsil müəssisələri üzrə 255 uşağın məktəbəqədər təhsilə cəlb olunması gözlənilir. Bu istiqamətdə işlər davam etdirilir. Növbəlilik və prioritetlik prinsipi əsasında yeni məktəbəqədər təhsil müəssisələri inşa edilir”.
Eyni zamanda Elm və Təhsil Nazirliyindən “Azərbaycan müəllimi”nə bildirilib ki, 2025-ci il investisiya büdcəsi çərçivəsində 15 təhsil müəssisəsində təmir-tikinti işlərinin yekunlaşması nəzərdə tutulur: “Cari ildə dövlət büdcəsinin mərkəzləşdirilmiş xərclərinin "Təhsil" bölməsi üzrə ayrılmış müvafiq xərclər hesabına 779 təhsil müəssisəsində təmir işlərinə başlanılıb. Bundan başqa, 629 məktəbəqədər təhsil müəssisəsində də təmir işləri aparılır”.
Qeyd edilib ki, bundan əlavə, cari təmir işləri 766 ümumi təhsil müəssisəsi, 629 məktəbəqədər təhsil müəssisəsi, 5 kollecdə və 8 peşə təhsil müəssisəsində aparılır. Təmir-tikinti işləri respublikanın bütün bölgələrini əhatə edir.
Tikintisi və təmiri davam edən bütün təhsil müəssisələrinin 2025-ci ilin sonunadək istifadəyə verilməsi planlaşdırılır.
