Bu ilin iyul ayının əvvəlinə olan məlumata görə, Azərbaycanda 353 min 313 nəfər ünvanlı dövlət sosial yardım alıb.
1xeber.media açıqlanan rəsmi məlumatlara istinadən xəbər verir ki, bir nəfərə düşən aylıq ünvanlı dövlət sosial yardımın məbləği isə 100 manat 37 qəpik olub.
Qeyd edək ki, əvvəlki ilin eyni dövrü ilə müqayisədə ünvanlı dövlət sosial yardım alan şəxslərin sayı 87 min 28 nəfər və ya 32,7% artıb. Onlara verilən ünvanlı dövlət sosial yardımın aylıq məbləği isə 9 manat 23 qəpik azalıb.
Ünvanlı dövlət sosial yardım alanların sayına görə ilk sırada Bakı şəhəri yer alıb. Paytaxtda 40 min 825 nəfər ünvanlı dövlət sosial yardım alıb.
Qeyd edək ki, ünvanlı dövlət sosial yardım orta aylıq gəliri onlardan asılı olmayan səbəblərdən hər bir ailə üzvü üçün ehtiyac meyarından – 285 manatdan aşağı olan aztəminatlı ailələrə verilir.
