BMT bu ilin əvvəlindən İranda 850-yə yaxın insanın edam edildiyini elan edərək, ölüm hökmünün dövlət repressiyası və hədə-qorxu aləti kimi sistematik şəkildə istifadə edilməsindən narahatlığını bildirib.
1xeber.media xəbər verir ki, bu haqda Birləşmiş Millətlər Təşkilatının İnsan Hüquqları Ofisinin bəyanatında qeyd olunub.
Bu gün yayılan bəyanatda elan edilib ki, 2025-ci ilin birinci yarısında İranda edamların sayı əhəmiyyətli dərəcədə artıb.
"İran hakimiyyəti ilin əvvəlindən 2025-ci il avqustun 28-dək ən azı 841 nəfəri edam edib. Şəffaflığın olmadığını nəzərə alsaq, real rəqəmlər fərqli və daha çox ola bilər", - BMT-nin İnsan Hüquqları Ofisinin sözçüsü Ravina Şamdasani Cenevrədə jurnalistlərə açıqlamasında bildirib.
O, təkcə iyul ayında İran hökumətinin ən azı 110 nəfəri edam etdiyini və bunu 2024-cü ilin eyni dövründəki edam sayından iki dəfə çox olduğuna diqqət çəkib:
“Edamların çoxluğu, qeyri-mütənasib olaraq etnik azlıqları və miqrantları hədəf alan ölüm cəzasının dövlət repressiyası və hədə-qorxu aləti kimi istifadəsinin sistematik modelini əks etdirir”.
