Bakıda, keçmiş Xaqani parkı (indiki Malakan bağı) yaxınlığında yerləşən bərbərxanadan 60 ədəd protez saç oğurlayan şəxs barəsində məhkəmə hökmü çıxarılıb.
1xeber.media məlumatına görə, 1981-ci il avqustun 1-də Salyan rayonunun Atbulaq kəndində anadan olmuş Ramil Həsənova (soyad şərti) Cinayət Məcəlləsinin 177.2.4-cü maddəsi ilə cinayət işi açılıb və məhkəmədə baxılıb.
Məlum olub ki, Ramil işlədiyi bərbərxanada zərərçəkmiş İslam adlı şəxsin mülkiyyətinə məxsus malları oğurlayıb. Belə ki, o, ümumi dəyəri 720 manat olan 12 ədəd "X4 Tape 41,4mf” markalı protez saç yapışqanı, ümumi dəyəri 580 manat olan 20 ədəd "Ultra Hold” (15 ml) markalı yapışdırıcı və ümumi dəyəri 480 manat təşkil edən 15 ədəd "Solvent 1” (18 ml) markalı maddələri götürüb. Ümumilikdə isə o, 13 min 665 manat 80 qəpik dəyərində maddi ziyan vurub.
Ramil oğurladığı protez saçları tanışının vasitəsilə "TikTok” sosial şəbəkəsində tanış olduğu, Lokbatanda bərbər kimi çalışan İsaq adlı şəxsə satıb. Daha sonra İsaq həmin protezləri sosial şəbəkələrdə reklam edərkən, zərərçəkmiş onları görüb və oğurluğun üstü açılıb.
Məhkəmədə ifadə verən Ramil bildirib ki, zərərçəkmiş İslam Pakistanda istehsal olunan və Türkiyədə satılan protez saçların birini 15-16 manata alır. Onları Bakıda müştərilərə 240 manata satırmış. Ramil oğurladığı protezləri 20-25 manata İsaqa verdiyini etiraf edib.
Məhkəmənin hökmü ilə Ramil Həsənov 2 il müddətinə azadlığın məhdudlaşdırılması cəzasına məhkum edilib. O, bu müddətdə elektron qolbaqla nəzarət altında olacaq.
