1xeber.media xəbər verir ki, Rumıniyada keçirilən parlament seçkilərində özlərini Avropayönlü adlandıran və Ukraynaya davamlı dəstəyin tərəfdarı olan partiyalar ölkənin növbəti hökumətini formalaşdırmaq üçün kifayət qədər səs toplayır.
Bunlar ilkin səsvermənin nəticələridir. Seçkilər sağçı populist namizəd Kalin Georgescu gözlənilmədən prezident seçkilərinin ikinci turuna vəsiqə qazandıqdan bir həftə sonra baş tutub.Rumıniyanın Sosial Demokrat Partiyası bülletenlərin 99,45%-nin hesablanmasından sonra 22,6% səs toplayır, Reuters ölkənin seçki bürosunun məlumatlarına istinadən xəbər verir.
Liberal müxalifət partiyası “Rumıniyanın Qurtuluşu Uğrunda İttifaq” 12,1%, Sosial Demokratlarla birlikdə hazırkı hakim koalisiyaya daxil olan Milli Liberal Partiyası isə 14,4% səs toplayıb.İfrat sağçı Rumınların Birliyi Alyansı 18,2% səslə ikinci yerdədir. Digər ifrat sağçı partiyalar SOS Rumıniya və Gənc Xalq Partiyası müvafiq olaraq 7,6% və 6,3% səs toplayır.Nəhayət, Rumıniyadakı Macarların Demokratik İttifaqı, ilkin hesablamalara görə, 6,5% səs toplayır.
Rumıniyada keçid həddi 5%-dir. Hər bir partiyanın parlamentdə neçə yer alacağı isə 5 faiz səs ala bilməyən partiyaların səsləri bölüşdürüldükdən sonra bəlli olacaq.Nəticələr köklü şəkildə dəyişməsə, Sosial Demokratlar və digər Avropayönlü partiyaların hökuməti formalaşdırmaq üçün parlamentdə kifayət qədər yer tutacağı ehtimal edilir.
